ඉතාලි මහමැතිවරණය අවසන් වී දෙමසකට පසුව අර්බුද මධ්‍යයේ පිහිටුවා ගත් නව සන්ධාන රජයේ මැතිඇමැතිවරු ඊයේ(28) දිවුරුම් දුන්නේය. 
නව රජයේ මැතිඇමැතිවරු දිවුරුම්දීමේ උත්සවය පැවැතියේ රෝමයේ පිහිටි ඉතාලි ජනපති මැදුරේදීය. එහිදී අගමැතිවරයා ඇතුළු ඇමැතිවරු 21 දෙනෙක් සිය ධූරයන්හි වැඩ බාර ගත්හ.

 

ජනපති ජෝර්ජියෝ නැපොලිටානෝ (වමේ) හා නව අගමැති එන්රිකෝ ලෙටා(දකුණේ)



ජනපති ජෝර්ජියෝ නැපොලිටානෝගේ ප‍්‍රදානx ත්වයෙන් පැවැති එම උත්සවයේදී හතළිස් හය හැවිරිදි එන්රිකෝ ලෙටා අගමැති ධූරයේ වැඩ බාර ගත්තේය. ඒ අනුව ඔහු යුරෝපා සංගමයේ රටක අගමැති ධූරය හොබවන වයසින් අඩු තැනැත්තා බවට පත්විය.

මෙහිදී යුරෝපා කොමිසමේ හිටපු කොමසාරිස්වරියක වූ හැටපස් හැවිරිදි එමා බොනිනෝ හට විදේශ කටයුතු ඇමැති ධූරය හිමිවිය. ආර්ථික කටයුතු පිළිබඳ ඇමැති ධූරය හිමි වූයේ ඉතාලි මහ බැංකුවේ හිටපු අධ්‍යක්ෂකවරයා වූ ෆැබ්රිසියෝ සකොමානිටය. 

නැවත මැතිවරණයකදී අර්බුද මතු නොවන අයුරින් සංකීර්ණ ඉතාලි මැතිවරණ ක‍්‍රමය සංශෝධනය කිරීම තම ප‍්‍රධාන අරමුණ බව නව අගමැති එන්රිකෝ ලෙටා සඳහන් කළේය. 

ඉකුත් පෙබරවාරි මස පැවැති ඉතාලි මහමැතිවරණයෙන් ජය ගැනීමට මධ්‍ය වාමාංශික පක්ෂයට හැකි වූවද බහුතර බලයක් හිමිකර ගැනීමට නොහැකි වීමෙන් රජයක් පිහිටුවීම සම්බන්ධයෙන් දේශපාලන අර්බුදයක් නිර්මාණය විය.

මේ උත්සවය පැවැත්වෙන අතරතුර ජනපති මැදුරට නුදුරු ස්ථානයක වෙඩිතැබීමක් සිදු වූ බවත් ඉන් පොලිස් නිලධාරීන් දෙදෙනකු තුවාල ලැබූ බවත් වාර්තා වේ.