දශක දෙකක් තිස්සේ ඉතියෝපියාවේ අගමැති ධූරය දැරූ පනස්හත් හැවිරිදි මෙලේස් සෙනාවි විදෙස් රෝහලක ප‍්‍රතිකාර ලබමින් සිටියදී පෙරේදා(21) මියගිය බව එරට රජය ප‍්‍රකාශ කළේය. මීට මාස දෙකකට පෙර හදිසියේ රෝගාතුරවීම හේතුවෙන් ප‍්‍රතිකාර ගැනීම සඳහා බ‍්‍රසල්ස්හි පිහිටි රෝහලක් වෙත මෙලේස් මාරු කර යවා ඇති බවත් එහිදී අගමැතිවරයා මියගොස් ඇති බවත් එරට රජය වැඩිදුරටත් සඳහන් කළේය. ඉතියෝපියාවේ ඒකාධිපති පාලනයක් ගෙන ගිය මෙන්ගිට්සු හයිලේ මරියම් බලයෙන් පහකර 1991 දී බලයට පත් වූ මෙලේස් එරට කැරැලි නායකයෙකි. අගමැතිවරයාගේ අභාවයෙන් හිස් වූ ධූරයට එරට උප අගමැති ලෙස කටයුතු කරන පනස්හත් හැවිරිදි හේලිමරියාම් ඩෙසලෙගන් පත් කරනු ඇතැයි වාර්තා වේ. මෙලේස් ශ්‍රේෂ්ඨ නායකයකු බව පැවසූ කෙන්යා අගමැති රයිලා ඔඩින්ගා සඳහන් කළේ ඔහුගේ මරණයෙන් පසුව ඉතියෝපියාවේ අනාගතය පිළිබඳ සැකසංකා මතුවන බවයි.