ජාත්‍යන්තර ආරක්ෂක සහායක බළකායට අයත් හෙලිකොප්ටර් යානයක් ඊයේ(12) දකුණුදිග ඇෆ්ගනිස්තානයේදී අනතුරට ලක්වීමෙන් එහි සිටි නේටෝ භටයෝ පස් දෙනෙක් ජීවිතක්ෂයට පත් වූහ.
හෙලිකොප්ටරය අනතුරට ලක්ව ඇත්තේ දමාන් පළාතේදීය. අනතුරට හේතුව අයහපත් කාලගුණික තත්ත්වය බවත් ඒ මොහොත වනවිට එම ප‍්‍රදේශයේ සතුරු කි‍්‍රයාකාරකම් නොතිබූ බවත් කාබුල් හමුදා ප‍්‍රකාශකයෙක් පැවැසීය.
මියගිය හමුදා සෙබළුන් කුමන ජාතීන්ට අයත්දැයි මෙතෙක් හෙළි වී නොමැත. කෙසේ නමුත් දකුණුදිග ඇෆ්ගනිස්තානයේ මෙහෙයුම්වල නිරතව සිටින්නෝ ඇමෙරිකානු, බි‍්‍රතාන්‍ය සහ  ඕස්ටේ‍්‍රලියානු භටයෝය.
ඉකුත් අගෝස්තු මාසයේදී බ්ලැක් හෝක් වර්ගයට අයත් හෙලිකොප්ටරයක් අනතුරට පත් වීමෙන් ඇමෙරිකානු භටයෝ හත්දෙනෙක් ද ඇෆ්ගන් ජාතිකයන් සිව්දෙනෙක් ද ජීවිතක්ෂයට පත් වූහ.
තලේබාන් සංවිධානය ඇතුළු අන්තවාදී සටන්කාමී කණ්ඩායම්වලට එරෙහිව සටන් වැදීම සඳහා මේ වන විට විදෙස් හමුදා භටයෝ 1,00,000 පමණ ඇෆ්ගනිස්තානයේ රැඳී සිටිති. එනිසා රට තුළ සිදු වන ගුවන්ගමන් ඉහළ අගයක් ගන්නා අතරම නිරන්තරයෙන් ගුවන්යානා අනතුරු සිදු වන බව නේටෝ ප‍්‍රකාශකයෙක් පැවැසීය.