චීනයේ සංචාරයකට පැමිණි ඇමෙරිකානු භාණ්ඩාගාර ලේකම් ජැක් ලිව් ඊයේ (19) එරට නව ජනාධිපති සී ජිංපිං හමුවී සාකච්ඡා පැවැත්වීය.
දෙරට අතර ආර්ථික සබඳතා ශක්තිමත් කර ගැනීමේ අරමුණින් එම සාකච්ඡුා පැවැත් වූ බව විදෙස් පුවත් සේවා පවසයි.
ලෝකයේ ආර්ථික බලවතුන් දෙදෙනා වන ඇමෙරිකාවත් චීනයත් අතර සබඳතා ශක්තිමත් කිරීම දෙරටේ මිතුදම් වර්ධනය කර ගැනීමට ඉවහල් වනු ඇතැයි භාණ්ඩාගාරික ලේකම් ජැක් ලිව් නව ජනපතිවරයාට පැවැසූ බවත් නව ජනපති ජිංපිං එය අනුමත කළ බවත් විදෙස් පුවත් සේවා වැඩි දුරටත් කියා සිටියේය.
ආසියාවේ බලවතා වන චීනය ඇමෙරිකාවට අංශ ගණනාවකින් අභියෝගයක් වී ඇත. ආසියාවේ තම බලය ව්‍යාප්ත කර ගැනීමට ඇමෙරිකාව උත්සහ ගන්නා අතර චීනයෙන් ඊට බාධා එල්ල වේ. පසුගියදා ඇමෙරිකාව චෝදනා කළේ ඔවුන්ට එල්ල වූ පරිගණක සයිබර් ප‍්‍රහාර පසුපස චීනය සිටින බවය.
මීට මාස හතරකට පෙර චීනයේ කොමියුනිස්ට් පක්ෂ නායකයා ලෙස තේරී පත් වී ජිංපිං ජනපති ධුරයට පත් වූයේ ඉකුත් 14 වැනිදාය. චීනයේ ජනපති ධුරයට පත්වන්නේ එරට කොමියුනිස්ට් පක්ෂයේ නායකයාය.
එම අවස්ථාවේදී ඔහුට ඇමෙරිකා ජනපති බැරැක් ඔබාමා ද සුබ පැතුවේය. ඔබාමා කියා සිටියේ චීනයේ නව නායකත්වය සමඟ සුහදත්වයෙන් කටයුතු කිරීමට ඇමෙරිකාව බලාපොරොත්තු වන බවය.