‘හකානී’ සටන්කාමීන් සම්බන්ධයෙන් හටගත් අර්බුදය, දුරදිග යෑමට ඉඩ නොදී සාමකාමීව විසඳා ගැනීමට ඇමෙරිකාවත් පාකිස්තානයත් සහයෝගයෙන් කටයුතු කළ යුතු යැයි ඇමෙරිකානු රාජ්‍ය ලේකම් හිලරි ක්ලින්ටන් අවධාරණය කරයි. ඇමෙරිකා/පාකිස්තාන මිත‍්‍රත්වය යළිත් වරක් පළුඳු වූයේ පාකිස්තානයේ කි‍්‍රයාත්මක ‘හකානී’ සටන්කාමීන්ට පාකිස්තාන රජයේ සහ බුද්ධි අංශවල සහාය ලැබෙන බවට ඇමෙරිකා හමුදා මාණ්ඩලීක ප‍්‍රධානී අද්මිරාල් මයික් මූලන් චෝදනා එල්ල කිරීමත් සමඟය. එම චෝදනා මේ වනවිට ඔප්පු වී ඇතැයි ඇමෙරිකාව පවසයි. කෙසේ නමුත් පාකිස්තාන රජය කියා සිටින්නේ  කිසිම අවස්ථාවක ඉස්ලාමීය සටන්කාමීන්ට උඩගෙඩි නොදෙන බවය. ‘හකානී’ සටන්කාමී ජාලය, ත‍්‍රස්තවාදී සංවිධානයක් ලෙස නම් කිරීමට සියලූ කටයුතු මේ වනවිට සූදානම් යැයි ද ඇමෙරිකා රාජ්‍ය ලේකම් හිලරි ක්ලින්ටන් වැඩිදුරටත් කියා සිටියි. හකානී ජාලයේ කටයුතු ගැන සොයා බැලීමට ඇමෙරිකාව පාකිස්තාන රජයෙන් කළ ඉල්ලීම පාකිස්තානය ප‍්‍රතික්ෂේප කිරීම නිසා දෙරටේ හොඳහිත පළුදු වී තිබේ. සහාය නොදක්වන්නේ නම් පාකිස්තානයට එරෙහිව යුදමය කි‍්‍රයා මාර්ගයක් ගන්නා බව ඇමෙරිකාව ප‍්‍රකාශ කිරීමත් සමඟ පාකිස්තාන රජය, ඇමෙරිකාවේ සිටින තම තානාපතිවරයා ද යළි ගෙන්වා ගැනීමට තීරණය කළේය. හකානී යනු අල් කයිඩාවට හිතවත් පාකිස්තානයේ කි‍්‍රයාත්මක සටන්කාමී සංවිධානයකි. ඉකුත් 13 වැනිදා ඇෆ්ගනිස්තානයේ කාබුල් නුවර ඇමෙරිකා තානාපති කාර්යාලයට පහර දීම පසුපස ‘හකානී’ සටන්කාමීන් සිටින බව ඇමෙරිකාව චෝදනා කරයි. ඇමෙරිකා හමුදා මාණ්ඩලීක ප‍්‍රධානී අද්මිරාල් මයික් මූලන් ද පාකිස්තාන රජයෙන් ඉල්ලා ඇත්තේ හකානී සටන්කාමී ජාලය සමඟ සම්බන්ධකම් තිබේ නම් ඒවා වහාම නවත්වන ලෙසටත් හකානී සටන්කාමීන්ගේ කටයුතු ගැන සොයා බලන ලෙසටත්ය. චීනයට සහ රුසියාවට මායිම්ව පිහිටි පාකිස්තානයට එරෙහිව ඇමෙරිකාව යුදමය කි‍්‍රයා මාර්ගයකට එළැඹුණහොත්, චීනයත් රුසියාවත් පාකිස්තානයට සහාය ලබා දෙනු ඇතැයි දේශපාලන විචාරකයෝ පවසති. චීන රජය මේ වනවිටත් ඇමෙරිකාවට අනතුරු අඟවා ඇත්තේ පාකිස්තානයට ප‍්‍රහාරයක් එල්ල කිරීමෙන් වැළැකී සිටින ලෙසටය.
ඉස්ලාමාබාද් නුවරදීය (ඒ.එෆ්.පී.)