ඇමෙරිකාවේ අයවැය අර්බුදයට හේතුවක් වූ තම සෞඛ්‍ය ආරක්ෂක පනත ගැන ඇමෙරිකා ජනපති බැරැුක් ඔබාමා පෙරේදා (21) ධවල මන්දිරයේ දී විශේෂ දේශනයක් පැවැත්වීය.

දේශනය පැවැත් වෙද්දී, ඊට සම්බන්ධ වී සිටි ගැබිනි මවක සිහිසුන්ව ඇද වැටීමට ගිය අවස්ථාවේදී, ජනපති ඔබාමා වහා කි‍්‍රයාත්මක වී ඇය අල්ලා ගත්තේය. ඔබාමා ඇය අල්ලා නොගත්තේ නම් ඇය ඇද  වැටීමට ද ඉඩ තිබුණි.

සිහිසුන්ව ඇද වැටීමට ගියේ සැන් ඩියේගෝහි පදිංචි කාමෙල් ඇලිසන් නම් කාන්තාවය. ඇය දියවැඩියා රෝගියෙක් ද වෙයි.

ඒ නිසා ඇමෙරිකාවේ දැනට කි‍්‍රයාත්මක වෛද්‍ය ක‍්‍රමය යටතේ  ඇයට සෞඛ්‍ය පහසුකම් ලබා ගැනීම දුෂ්කරය. කෙසේ නමුත් ඔබාමාගේ සෞඛ්‍ය ආරක්ෂක පනත යටතේ ඇයට ද සෞඛ්‍ය රක්ෂණයක් ලැබී ඇත. ඇය දේශනයට එක් වී සිටියේ ඔබාමාට ඇගේ කෘතඥතාව පළ කිරීමට යැයි ද ඇමෙරිකන් පුවත් සේවා කියා සිටියේය.

කාමෙල් ඇලිසන් අල්ලා ගත් අවස්ථාවේදී ඔබාමා රැස්ව සිටි පිරිසට කීවේ, තම දේශන දිග වැඩි බවත් බොහෝ දෙනා ඒවා අසා සිටීමෙන් සිහිසුන් වන බවත්ය.