ඇමෙරිකා රාජ්‍ය රහස් ලොවට හෙළි කළ ජුලියන් ඇසෙන්ජ්ගේ ‘විකිලීක්ස්’ වෙබ් ජාලය පෙරේදා (31) සයිබර් ප‍්‍රහාරයකින් අඩපණ විය. පරිගණක ආධාරයෙන් අන්තර් ජාලය හරහා ‘විකිලීක්ස්’ වෙබ් ජාලයට එල්ල වූ එම සයිබර් ප‍්‍රහාරයෙන් වෙබ් ජාලයේ සියලූ කටයුතු ඇණහිට ඇති අතර එය කඩිනමින් යථා තත්ත්වයට පත්කර ගැනීමට හැකිවනු ඇතැයි විකිලීක්ස් ආයතනයේ පරිගණක විශේෂඥයෝ පවසති. විකිලීක්ස් වෙබ් අඩවිය සහ එහි නිර්මාතෘ ජුලියන් ඇසෙන්ජ්, ඇමෙරිකා රජයේ උදහසට ලක් වූයේ ඇමෙරිකා රාජ්‍ය සහ හමුදා රහස් අන්තර් ජාලය හරහා ප‍්‍රසිද්ධියට පත් කිරීමෙන් පසුවය. ඉකුත් වසරේ පමණක් දින දෙකක් ඇතුළතදී විකිලීක්ස් හරහා ප‍්‍රසිද්ධියට පත් වූ රාජ්‍ය වාර්තා ගණන 250,000 කට වැඩිය. විකිලීක්ස් ආයතනය පවසන්නේ පෙරේදා එල්ල වූ එම සයිබර් ප‍්‍රහාරය පසුපස ඇමෙරිකා රජය සිටින බවය. ලෝකයේ අවධානය ලිබියාව සහ මැදපෙරදිග අර්බුද වෙත යොමුව තිබෙන අවස්ථාවක හොරෙ රහසේ විකිලීක්ස් වෙබ් අඩවිය අඩපණ කිරීමේ මෙහෙයුමක් ඇමෙරිකානුවන් ආරම්භ කර ඇතැයි ලන්ඩන් නුවර මූලස්ථානය කොට ගත් විකිලීක්ස් වෙබ් ජාලයේ ප‍්‍රකාශකයෙක් මාධ්‍ය හමුවක් පවත්වමින් කියා සිටියේය.