මින් ඉදිරියට ඇමෙරිකාවට හෝ නෝටෝ හමුදාවට හෝ පාකිස්තාන භූමියට ඇතුළු වී කිසිම ආකාරයක පහර දීමක් කළ නොහැකි බවත් එසේ කරන්නේ නම් පාකිස්තානය ඊට නිසි ලෙස පිළිතුරු සැපැයීමට සූදානම් බවත් පාකිස්තාන හමුදාපති අෂ්ෆාක් කයානී අනතුරු අඟවයි. හමුදාපතිවරයා එම අනතුරු ඇඟවීම සිදු කළේ ඇමෙරිකා හමුදාවට අයත් නියමුවන් රහිත ඩ්‍රෝන යානා එල්ල කළ මිසයිල ප‍්‍රහාරයෙන් මියගිය පාකිස්තාන සෙබළුන්ගේ සහ නිලධාරීන්ගේ අවමංගල්‍යයට ඊයේ (28) සහභාගී වූ අවස්ථාවේදීය. ඇමෙරිකා ඩ්‍රෝන යානා හමුදා මුරපොළ ඉලක්ක කර එම මිසයිල ප‍්‍රහාර එල්ල කළේ ඇෆ්ගන්/පාකිස්තාන දේශසීමාව හරහා පාකිස්තානයට ඇතුළු වෙමිනි. එම මිසයිල ප‍්‍රහාර වලින් හමුදා සෙබළු 13 දෙනෙක් තුවාල ලැබූහ. ප‍්‍රහාරය සිදුවූයේ අත්වැරදීමකින් හෝ අහඹු සිදුවීමක් නිසා හෝ නොවන බව පාකිස්තාන හමුදාපතිවරයා අවධාරණය කරයි. පාකිස්තානයේ ස්වෛරීත්වයට ඇමෙරිකාව ගරු කළ යුතු බව ද හමුදාපති කයානී වැඩිදුරටත් කියා සිටියි. ප‍්‍රහාරය එල්ල වූ බව සැලැවීමත් සමඟ පාකිස්තාන ආරක්ෂක මණ්ඩලය හදිසි රැස්වීමක් පැවැත්වීය. ආරක්ෂක මණ්ඩලයේ මුලසුන හොබවන්නේ පාකිස්තාන අගමැති යූසොෆ් රාසා ගිලානිය. ඇමෙරිකාවට හෝ නේටෝවට පාකිස්තාන භූමියට ඇතුළු වී මින් ඉදිරියට කිසිදු ආකාරයේ මෙහෙයුමක් සිදු කිරීමට ඉඩ ලබා නොදීමට එහිදී එකඟත්වයක් ඇතිකර ගැණුනි. ඇමෙරිකා හමුදාව එසේ කරන්නේ නම් ඊට එරෙහිව දැඩි පියවර ගැනීමට ද පාකිස්තාන ආරක්ෂක මණ්ඩලය එහිදී තීරණය කළේය. ඇෆ්ගනිස්තානයේ මෙහෙයුම්වල නියැලෙන විදෙස් හමුදා සෙබළුන්ට අවශ්‍ය බඩුබාහිරාදිය සැපැයීම සිදු කරන්නේ ඇෆ්ගන්/පාකිස්තාන දේශසීමාවේ ටෝක්හම් සහ චාමාන් යන මාර්ග හරහාය. එම දේශසීමා මාර්ග මේ වනවිට වසා දමා තිබේ.