ඇමෙරිකා රජය එරට එන්.ඒ.එස්. හෙවත් ජාතික ආරක්ෂක ඒජන්සිය හරහා ජාත්‍යන්තර නීති උල්ලංගනය කරමින්, සිදු කරන ඔත්තු බැලීමේ කටයුතුවලට එරෙහිව තීරණයක් ගැනීමට ජර්මන් පාර්ලිමේන්තුව ඊයේ (29) රැස්විය.

ජර්මන් පාර්ලිමේන්තුව එම හදිසි සැසිවාරය පැවැත් වූයේ, ඇමෙරිකන් රජය, ජර්මන් චාන්සල්වරියගේ දුරකතන සංවාද හොරෙන් අසා සිටි බවට විස්තර ඇතුළත් රහස් වාර්තාවක් ප‍්‍රසිද්ධියට පත් වීම මුල්කොට ගනිමිනි.

එම ඔත්තු බැලීම් ගැන ජර්මන් චාන්සලර් ඇන්ජෙලා මාකෙල් ඇමෙරිකාවට දොස් පවරා ඇත. එම අවස්ථාවේ, ඇමෙරිකන් ජනපති ඔබාමා ඇයට දුරකතන ඇමතුමක් දී කියා සිටියේ, ඔහු එම ඔත්තු බැලීම් ගැන දැන නොසිටි බවය.

එම සිද්ධිය මුල්කොට ගනිමින්, ජර්මන් බුද්ධි අංශ නිලධාරීන් කණ්ඩායමක් මේ වනවිට ඇමෙරිකාවට ගොස් ඇමෙරිකාවේ සී.අයි.ඒ. බුද්ධි අංශය සමඟත් එන්.ඒ.එස්. හෙවත් ජාතික ආරක්ෂක ඒජන්සිය සමඟත් සාකච්ඡුා පැවැත්වූ බව ද වාර්තා වේ.

ඇමෙරිකා රජය, අන්තර් ජාතික නීති උල්ලංගනය කරමින්, එරට ජාතික ආරක්ෂාවට වෙනුවෙන් යැයි පවසා, ලෝක නායකයන් ගැන සිදු කරන ඔත්තු බැලීම් වහා නැවැත්විය යුතු යැයි බල කරමින් ජර්මන් චාන්සල්වරිය, එක්සත් ජාතීන්ගේ සංවිධානය හරහා ඇමෙරිකාවට එරෙහිව යෝජනාවක් ගෙන ඒමටද සූදානම් වී සිටින්නීය.

ඇමෙරිකාව තම රටවල් සම්බන්ධයෙන් සිදුකරන ඔත්තු බැලීම් කිසිසේත් අනුමත කළ නොහැකි බවත්, එම ඔත්තු බැලීමේ සම්බන්ධයෙන් ඇමෙරිකාව සමඟ පොදු එකඟතාවක් ඇතිකර ගත යුතු බවත්, ජර්මන් චාන්සල්වරිය පවසා ඇත.

ජර්මනිය සහ බ‍්‍රසීලය වැඩි දුරටත් පවසා ඇත්තේ, තමන් ඇමෙරිකාවේ සමීපතම මිතුරක් බවත්, එසේ තිබියදී ඇමෙරිකාව තමන් ගැන ඔත්තු බැලීම ගැන තමන් දැඩි ලෙස කනස්සල්ලට පත් වී සිටින බවත්ය.

ඇමෙරිකාව සිදුකරවන ඔත්තු බැලීම් සම්බන්ධයෙන් රහස් වාර්තා දහස් ගණනින් මාධ්‍ය ආයතනවලට ලබා දී ඇත්තේ, එන්.එස්.ඒ. ඒජන්සියේ හිටපු කොන්ත‍්‍රාත්කරුවකු වන එඞ්වඞ් ස්නෝව්ඩන්ය.

ස්නෝව්ඩන් ලබා දුන් එම වාර්තා, බි‍්‍රතාන්‍යයේ ‘ගාඩියන්’, ප‍්‍රංශයේ ‘ලා මොන්ද්’ සහ ජර්මනියේ ප‍්‍රධාන පෙළේ පුවත්පත් රැසක් මේ වනවිට ප‍්‍රසිද්ධියට පත් කර ඇත.

ඇමෙරිකාවේ අත්අඩංගුවෙන් බේරී ස්නෝව්ඩන්, මේ වනවිට ජීවත් වන්නේ රුසියාවේය. ඒ, රුසියානු රජයේ රැකවල් යටතේය. ස්නෝව්ඩන්ට රුසියාවෙන් පිටවී යෑමට නොහැකිය. ඔහු එසේ කළහොත් ඔහු අත්අඩංගුවට ගැනීමට ඇමෙරිකාව සූදානමින් සිටී.

ඇමෙරිකන් රජය සහ සී.අයි.ඒ. බුද්ධි අංශය, ජාතික ආරක්ෂක ඒජන්සිය හරහා  ජර්මන් චාන්සලර් මාකෙල්ගේ පමණක් නොව, තවත් රාජ්‍ය නායකයන් 35 දෙනකුගේ දුරකතක සංවාද සහ ඊ මේල් පණිවුඩවලට හොරෙන් කන් දෙමින් ඔත්තු බැලීම් සිදුකර ඇතැයි නවතම වාර්තාවල දැක්වෙයි.
 

ජර්මන් චාන්සල්වරිය