ඇමෙරිකා එක්සත් ජනපද බුද්ධි අංශවල ක්‍රියාකාරකම් ජර්මනියේ නාසිවාදීන් සිහි ගන්වන බවට ඩොනල්ඩ් ට්‍රම්ප් මහතා චෝදනා කරයි. ඩොනල්ඩ් ට්‍රම්ප් මහතා ලබන 20 වැනිදා ඇමෙරිකාවේ 45 වැනි ජනාධිපතිවරයා ලෙස දිවුරුම් දීමට නියමිතය.

බුද්ධි අංශවල තොරතුරු පිටවීමෙන් තමන් රුසියානු උගුලක හසු වී සිටින බවත් වැරැදි තොරතුරු මාධ්‍ය වාර්තා කර ඇතැයි පවසමින් රිපබ්ලිකන් පාක්ෂික ට්‍රම්ප් මහතා බුද්ධි අංශවලට චෝදනා තවදුරටත් චෝදනා කළේය.

“මේ නිසා මම දැඩි කනස්සල්ලට පත්වුණා. මෙය ඉතා කනගාටුවට කරුණක්. බුද්ධි අංශ වැරැදි පුවත් පළවීමට ඉඩ ප්‍රස්ථාව දීලා. එය ඉතාමත් කනගාටුදයකයි. මෙවැනි දේවල්වලින් ජර්මනියේ නාසිවාදීන් කරපු දේවල් මතක් කරනවා” යැයි නිව්යෝක් නුවර පැවැති ප්‍රවෘත්ති සාකච්ඡාවකට එක්වෙමින් ඩොනල්ඩ් ට්‍රම්ප් මහතා පැවැසීය.

රුසියාව ඇමරිකාවේ ඩිමොක්‍රටික් පක්ෂ ජාතික කමිටුවේ විද්‍යුත් ලිපිනවලට සහ පරිගණකවලට අනවසරයෙන් පිවිස දත්ත වෙනස් කළ බව ට්‍රම්ප් මහතා පසුගිය දිනෙක පිළිගත්තේය. එම කරුණුවලට පිළිගත්තා පමණක් නොව තවත් රටවල් ඇමෙරිකා එක්සත් ජනපදයේ පරිගණකවලට අනවසරයෙන් පිවිස දත්ත වෙනස් කරමින් සයිබර් ප්‍රහාර එල්ල කරන බවද ට්‍රම්ප් මහතා එහිදි කීවේය.