ඇපල් සමාගමේ නවතම නිමැවුම වන අයිපෝන් 6 ප්ලස් ජංගම දුරකථනයට කළිසම් සාක්කු වල ගමන අකැප වී ඇති බවක් පෙනෙන්නට තිබේ.

නව ජංගම දුරකථනය එළිදැක්වූ විගසම එය මිලදී ගත් බොහෝ දෙනා දැන් පැමිණිලි කරමින් සිටින්නේ කුඩා පීඩනයක් යෙදීමෙන් පවා දුරකථනයේ රාමුව නැවිය හැකි බවයි.

එනම් අයිපෝනය සාක්කුවේ දමාගෙන ගමනේ යෙදීම, ආසනයක හිද ගැනීම පවා පෝනයේ රාමුවේ හැඩය වෙනස් කිරීමට සෑහෙන බව ඔවුහු කියති. ඔවුන් මේ සදහා සාක්ෂිද ඉදිරිපත් කැර ඇත.

එම සාක්ෂි ලෙස ඉදිරිපත් කර ඇති ඡායාරූපයන්ගේ දැක්වෙන ආකාරයට දුරකථනයේ පසුපස ඉහළ ප‍්‍රදේශය පසුපසට නැවී ගොස් තිබේ.මෙම ඇබැද්දියට මුහුණදී ඇති පරිශීලකයින් පවසන ආකාරයට තවදුරටත් රාමුව නැමුනේ නම් දුරකථනයේ තිරයටද හානි පැමිණේ.

විශේෂඥයින් පවසන්නේ ඇපල් සමාගම මේ නව අයිපෝනයේ නිපදවීමට ඉතා මෘදු ලෝහයක් වන ඇලූමිනියම් පමණක් භාවිතා කර තිබීමත් රාමුව ඉතා තුනී වීමත් මෙවන් තත්ත්වයක් ඇතිවීමට හේතුවී තිබෙන බවයි.

අඟල් 5.5 ක විසල් තිරයකින් යුතු වුවද රාමුව ඉතා තුනී යැයි අයිපෝන් 6 ප්ලස් එළිදැක්වීමට පෙර සිටම ඇපල් සමාගම එය ගැන වර්ණනා කරමින් සිටියේය.

දැන් එම වර්ණනාම ඔවුන්ට පාරාවළල්ලක්ව ඇති බව පෙනේ.

කෙසේනමුත් සාක්කුවේ දමාගෙන යෑමේදී රාමුවේ හැඩය වෙනස්වෙතැයි චෝදනා නැගුණු පළමු දුරකථනය නව අයිපෝනය පමණක් නොවේ. සැම්සුන්ග් සමාගමේ ගැලැක්සි එස් 5 ජංගම දුරකථනයටද, සෝනි සමාගමේ එසෙඞ් 1 ජංගම දුරකථනයටද මේ හා සමානම චෝදනා නැගී ඇත.

මේ සම්බන්ධයෙන් තවමත් කිසිදු ප‍්‍රකාශයක් ඇපල් සමාගම නිකුත් කර නොමැත.

1 2 3 4