ලිංගික අපහරණ චෝදනා සම්බන්ධයෙන්, ඇමෙරිකාවේ සිවිල් නඩුවකට මුහුණ දෙන බ්‍රිතාන්‍යයේ ඇන්ඩෲ කුමරුන් ඔහුට හිමි සියලු රාජකීය සහ හමුදා තනතුරවලින් ඉවත් කිරීමට එලිසබත් මහ රැජින තීරණය කර ඇතැයි බකිංහැම් මාලිගය නිකුත් කළ නිවේදනයක සඳහන් වෙයි.

61 හැවිරිදි ඇන්ඩෲ කුමරුන් යනු දෙවැනි එලිසබත් මහ රැජිනගේ දරුවන් තිදෙනාගෙන් තුන්වැන්නා වන අතර දෙවැනි පුත්‍රයාය. රාජකීය සහ හමුදා තනතුරවලින් ඉවත් කිරීමට සිදුවන බව දැනුම් දුන් අවස්ථාවේදී ඇන්ඩෲ කුමරු රැජිනගේ තීරණයට කිසිදු විරෝධයක් නොදක්වා ඊට හිස නැමූ බව බ්‍රිතාන්‍ය මාධ්‍ය වාර්තා පෙන්වා දෙයි.

කෙසේ නමුත් එල්ල වන ලිංගික අපහරණ චෝදනා සියල්ල කුමරු ප්‍රතික්ෂේප කර ඇත.
ඇන්ඩෲ කුමරු ඇමෙරිකානු ධන කුවේරයකු වූ ජෙෆ්රි එප්ස්ටීන්ගේ සමීපතම මිතුරෙක් විය. එප්ස්ටීන් ලිංගික වහල් සේවයක් පවත්වාගෙන ගියේ යැයි චෝදනා ලැබූවෙකි. එප්ස්ටීන් සමඟ පැවැති සමීප මිතුදම් නිසා තමන් අමාරුවේ වැටුණු බව ඇන්ඩෲ කුමරු පවසා ඇත.

ලිංගික අපරාධ සම්බන්ධයෙන් වරදකරු වුණු ජෙෆ්රි එප්ස්ටීන් බන්ධනාගාරගතව සිටිද්දී දිවි නසා ගත්තේය. ඒ, 2019 වසරේදීය. එප්ස්ටීන්, 17 හැවිරිදි යුවතියක ඇන්ඩෲ කුමරුන්ට ලබා දුන් බව පැවැසෙයි. කුමරුන්ට එරෙහිව ඇමෙරිකන් අධිකරණයක සිවිල් නඩුවක් ගොනු කළේ වර්ජිනියා ජුෆ්රේ නමැති එම තැනැත්තියයි.

වර්ජිනියා ජුෆ්රේ මේ වනවිට 38 හැවිරිදි වියෙහි පසුවන අතර, ඇය මෙම සිවිල් නඩුව ගොනු කර තිබෙන්නේ මීට වසර 21 කට පෙර ඇන්ඩෲ කුමරුන් තමන්ට ලිංගික අපයෝජනයක් කළේ යන චෝදනා සම්බන්ධයෙනි.
ඇන්ඩෲ කුමරු වසර 22 ක් බ්‍රිතාන්‍ය හමුදා නිලධාරියකු ලෙස කටයුතු කර ඇති අතර, ඔහු ප්‍රහාරක හෙලිකොප්ටර් යානා නියමුවෙකු ද වෙයි.

(රොයිටර්)