2023 ජනවාරි මස 31 වන අඟහරුවාදා
ඇන්ටාක්ටිකාවෙන් යෝධයෙක්
වසර ලක්ෂ හතලිහකට පමණ පෙර ජීවත් වූවා යැයි සැළකෙන යෝධ පෙන්ගුවින් කුරුල්ලකුගේ ඇටකටු ඇන්ටාක්ටිකාවෙන් සොයාගැනීමට හැකිවූ බව පුරාවිද්‍යාඥයෝ කියති.
අඩි හතකට ආසන්න උසකින් යුතු මේ යෝධ පෙන්ගුවින් මෙතෙක් සොයාගෙන ඇති සියළුම පෙන්ගුවින් කුරුල්ලන්ට වඩා උසින් වැඩි බව පර්යේෂකයෝ කියති. පැලීයුඩිප්ටස් ක්ලෙකොව්ස්කි ලෙස නම්කර ඇති මේ සත්ත්වයාගේ බර කිලෝ ග්‍රෑම් 115 පමණ වන්නට ඇතැයි නිගමනය කැර තිබේ.
ආජන්ටිනාවේ ලා ප්ලෙටා කෞතුකාගාරයේ ආචාර්ය කැරොලිනා අකොස්ටා මහත්මිය පවසන්නේ මේ පෙන්ගුවින් විශේෂය ජීවත් වූ කාලයේ ඇන්ටාක්ටිකාව අදට වඩා උණුසුම්ව පවතින්නට ඇති බවයි. එකළ ඇන්ටාක්ටිකාවේ පෙන්ගුවින් විශේෂ 10ත් 14ත් අතර ප්‍රමාණයක් සිටින්නට ඇතැයි ද මේ ඒ සියළු දෙනා අතරින් විශාලත ම විශේෂය බව ද ඇය පවසයි.
දැනට ලෝකයේ සිටින විශාලතම පෙන්ගුවින් විශේෂය වන එම්පයර් පෙන්ගුවින්ටත් වඩා විශාලත්වයෙන් වැඩි මේ විශේෂය ගැන පර්යේෂණ පැවැත්වූ විද්‍යාඥයන් පවසන්නේ ඔවුන්ගේ ශරීරයේ විශාලත්වය සැළකූ විට අවම වශයෙන් විනාඩි 40ක් වත් වතුර යට සිටින්නට ඇති බවයි.
අස්ථි පද්ධතිය, ශරීර හැඩය හා විශාලත්වය සැළකූ විට මේ සත්ත්වයාගේ ප්‍රධාන ආහාරය මත්ස්‍යයන් විය හැකි බවත් ඉතා වේගයෙන් ගොදුරු ඩැහැගැනීමට හැකි සත්ත්වයකුව සිටින්නට ඇති බවත් ආචාර්ය අකොස්ටා මහත්මිය වැඩිදුරටත් කියයි.
