(අජන්ත කුමාර අගලකඩ)
ආණ්ඩුව තුළ සිදුකෙරෙන වෙනස්කම් යටතේ ඉදිරි සති දෙක තුළ, අමාත්‍යාංශ ලේකම්වරුන් කිහිප දෙනකු ද මාරුකිරීමට ජනාධිපති මෛත්‍රීපාල සිරිසේන මහතාගේ අවධානය යොමු වී ඇතැයි රජයේ ආරංචි මාර්ග සඳහන් කරයි.

ගැටලුකාරී තත්ත්වයන් ඇති අමාත්‍යංශ කිහිපයක ලේකම්වරුන් කිහිප දෙනකු ඒ අනුව මාරු කෙරෙනු ඇතැයි එම ආරංචිමාර්ගවලින් පැවැසේ. රාජ්‍ය ආයතන කිහිපයක ප්‍රධානීන් ද සති දෙකක් තුළ මාරු කරන බව ජනාධිපති මෛත්‍රීපාල සිරිසේන මහතා ඉකුත් 20 වැනි දා පුවත්පත් කතුවරුන් සමග පැවැති හමුවකදී ප්‍රකාශ කර තිබිණි. එමෙන්ම ඇමැති මණ්ඩල සංශෝධනය ද වෙසක් පොහොයට පෙර බලාපොරොත්තු වන්න යැයි ජනාධිපතිවරයා එහිදී ඉඟියක් ද කර තිබිණි.

ආණ්ඩුවේ නිලතල කිහිපයක හා වැඩසටහන් රැසක පුළුල් වෙනසක් කිරීමට ජනාධිපතිවරයා තීරණය කර ඇති අතර, ඊට සමගාමීව මෙම වෙනස්කම් සිදුකෙරෙන බව වාර්තා වේ.