(බිමල් ශ්‍යාමන් ජයසිංහ)
 
පානදුර පිටවත්ත සංචාරක හෝටලයක පිහිනුම් තටාකයට ඇදවැටී නේපාල ජාතිකයකු මියගොස් ඇතැයි පානදුර දකුණ පොලිසිය කියයි.
 
මියගොස් ඇත්තේ නේපාලයේ ලලිත්ෂුර්හි පදිංචි සිටි නාරායන් බහුදුරු නමැති 75 හැවිරිදි පුද්ගලයෙකි.
 
නේපාල ජාතිකයන් 30දෙනෙකුගෙන් යුතු කණ්ඩායමක් සංචාරයක් සඳහා ලංකාවට පැමිණ ඇති අතර ඔවුන් නවාතැන් ගෙන සිටි හෝටලයේ පිහිනුම් තටාකයට ඇදවැටී මෙම තැනැත්තා මියගොස් ඇතැයි පොලිසිය කියයි.
 
හෝටලයේ සේවකයන් සහ සෙසු නේපාල සංචාරකයන් ඔහුව ගොඩගෙන පානදුර මූලික රෝහලට ඇතුළත් කර ඇති අතර එහිදී ඔහු මියගොස් ඇත.
 
මියගිය සංචාරකයාගේ පශ්චාත් මරණ පරීක්ෂණය අද(11) පැවැත්වීමට නියමිතය.
 
සිද්ධිය සම්බන්ධයෙන් පානදුර දකුණ පොලිසිය පරීක්ෂණ පවත්වයි.