පුෂ්පකුමාර ජයරත්න

නවකවධය දරාගත නොහැකිව ගෙළ වැළලාගෙන සියදිවි නසාගත් මොරටු සරසවි ශිෂ්‍යයාගේ මරණයට වගකිවයුතු සැකකරුවන් අනාවරණය කර ගැනීමට සහ ඔවුන්ට එරෙහිව චෝදනා ගොනු කරගැනීමට අවශ්‍ය පරීක්ෂණ පැවැත්වීම සඳහා  අදාළ බලධාරින්ට නියෝගයක් ලබාදෙන ලෙස කුරුණෑගල අධිකරණයේ කටයුතු කරන නීතිඥවරයකු වන පියුමාල් හේරත් මහතා කුරුණෑගල මහේස්ත්‍රාත් අධිකරණයෙන් ඉල්ලීමක් කළේය.

ඒ සම්බන්ධයෙන්වූ අදාළ ඉල්ලීම පියුමාල් හේරත් මහතා ලිඛිතව කුරුණෑගල ප්‍රධාන මහේස්ත්‍රාත් සම්පත් හේවාවසම් මහතා වෙත යොමුකර ඇත .

පසුගිය මර්තු මස 31 දා සිය නිවසේදී සියදිවි හානිකරගත් ශනිල්ක දිල්ෂාන් විජේසිංහ ශිෂ්‍යයා එසේ සියදිවි හානිකර ගැනීමට පෙර තමන් මෙසේ සියදිවි නසා ගැනීමට හේතුව ජ්‍යෙෂ්ඨ ශිෂ්‍යයන් වෙතින් දැඩි ලෙස නවකවදයට ගොදුරු වීම නිසා බවට මෙම සිද්ධියට අදාළ සියලුම තොරතුරු අනාවරණය කරමින් තම මව වෙත ලිපියක් ලියා ඇතැයි වාර්තා වී ඇති බව නීතිඥ හේරත් මහතා තම ලිපියෙන් පෙන්වාදී ඇත .

උග්‍ර නවකවදය හේතුවෙන් ඇතිවූ මානසික රෝගි තත්ත්වයකට හා මානසික පීඩනයකට පත්ව ඒ සඳහා මානසික රෝග වෛද්‍යවරයකුගෙන් පවා ප්‍රතිකාර පවා ලබාගෙන ඇති බවද පශ්චාත් මරණ පරීක්ෂණයේ දී මෙම මරණයට හේතුව උග්‍ර නවකවදය බව පැහැදිලිවම අනාවරණය වී ඇති බවද තම ලිපිය මඟින් කියා සිටියි.