(පුෂ්පකුමාර ජයරත්න)

කුරුණෑගල මහා නගර සභාව මගින් පාලනය වන සුන්දරාපොළ කසළ කන්දේ අද (29) පෙරවරුවේ සිට හටගෙන ඇති ගින්නක් මැඩ පැවැත්වීමට කුරුණෑගල මහා නගර සභාවේ ගිනි නිවීම් ඒකකය සහ කුරුණෑගල දිස්ත්‍රික් ආපදා කළමනාකරණ මධ්‍යස්ථානය එක්ව දැඩි උත්සාහයක යෙදී සිටිති.

මේ දිනවල කුරුණෑගලට පවතින අධික උෂ්ණත්වය සහ කසල කන්දේ එක්රැස්වී ඇති මීතේන් වායුව හේතුවෙන් මෙම ගින්න ඇතිවන්නට ඇතැයි සැකකරන අතර ආරම්භයේ ඉතා ප්‍රචණ්ඩකාරී ලෙස පැතිර යමින් තිබූ ගින්න මේ වනවිට යම් පාලනයකට ලක්කිරීමට හැකිව ඇති බව කුරුණෑගල නගරාධිපති තුෂාර සංජීව විතාරණ මහතා පැවසීය.

කසල කළමනාකරණ මධ්‍යස්ථානය තුළ පිහිටි කාබනික පොහොර සකස් කරන ඒකකයටද ගින්නෙන් සිදු වීමට ගිය හානිය වළක්වා ගැනීමට හැකිවී තිබෙන අතර, ඉදිරියේදී ගින්න නැවත පැතිර ගියහොත් ගින්න පාලනයට ගුවන් හමුදාවේ සහ යුද හමුදාවේ සහාය ලබා ගන්නා බවද නගරාධිපතිවරයා පැවසීය.