(පුත්තලම - ජුඩ්සමන්ත)
වව්නියාවේ සිට කොළඹ බලා ධාවනය වෙමින් තිබූ පුද්ගලික බස් රථයක කොන්දොස්තරවරයෙකුට ජීප් රථයකින් පැමිණි පිරිසක් විසින් පහර දීමේ සිද්ධියක් සම්බන්ධයෙන් විමර්ශණ කටයුතු ආරම්භ කර ඇති බව හලාවත පොලීසිය කියයි.

අද 28 දහවල් හලාවත - කොළඹ මාර්ගයේ පම්බල ප්‍රදේශයේදී මෙම පහර දීම සිදු වී ඇත.

එසේ පහර කෑමට ලක්ව ඇත්තේ ආරච්චිකට්ටුව - ආනවිළුන්දාව පදිංකරුවෙකු වන කේ.ඩී.සාලිය එදිරිසිංහ නම් අයෙකි.පහර දුන් අය තමන් අත තිබූ මගීන්ට ප්‍රවේශ පත්‍ර නිකුත් කරන යන්ත්‍රයද පොලවේ ගසා හානි කර ඇති බව බස් කොන්දොස්තරවරයා විසින් කර ඇති පැමිණිල්ලේ සඳහන් වේ.

මේ අයුරින්ම හලාවත - කොළඹ අතර ධාවනය වන පුද්ගලික බස් රථ රියදුරෙකුට පංචිකාවත්ත ප්‍රදේශයේදීද පසුගිය 26 වැනිදා පහර දී ඇත.

මේ සිද්ධිය සම්බන්ධයෙන් කිසිවෙකුත් අත්අඩංගුවට ගෙන නොමැති අතර,හලාවත පොලීසිය වැඩිදුර විමර්ශණ කටයුතු සිදුකරයි.