(රොමේෂ් මධුෂංඛ සහ සිතුම් චතුරංග)
 
වව්නියාව බෝගස්වැව ඇතුළු ගම්මාන 5 ක නැවත පදිංචි කරවූ වැසියන්ට වසර 7 ක කාලයක් තිස්සේ පොරොන්දු වූ පරිදි ගොවිතැන් කිරීමට කුඹුරු ඉඩම් නොදීම හේතුවෙන් එම ඉඩම් ඉල්ලා එම ගම්මානවල ජනතාව  රඹවේටිකුලම් වැව ඉදිරිපිටදී පදවිය මාර්ගය අවහිර කරමින් අද (04) උද්ඝෝෂණයක නිරත වූහ. 
 
බෝගස්වැව ගොවි අයිතීන් දිනාගැනීමේ සංවිධානය විසින් සංවිධානය කරන ලද මෙම උද්ඝෝෂණය සඳහා සමස්ත ලංකා ගොවිජන සම්මේලනයේ ප්‍රධාන සංවිධායක නාමල් කරුණාරත්න, උපසභාපති සුසන්ත කුමාර, එහි ලේකම් ටී.බී. සරත් යන අය ඇතුළු ගම්වාසීහු විශාල පිරිසක් සහභාගී වූහ.
 
බෝගස්වැව, නන්දිමිත්‍රගම, වෙහෙරතැන්න,සැලලිහිණිගම සහ නාමල්ගම පවුල් 2882ක් 2012 වසරේදී නැවත පදිංචි කරනු ලැබුවේ ගොඩින් අක්කරයක් සහ මඩින් කුඹුරු අක්කරයක භූමියක් ලබා දෙන බවට පොරොන්දු වුවද ගොඩින් අක්කරයක් තමන්ට ලැබුනද මෙතෙක් කුඹුරු ඉඩම් නොලැබීම හේතුවෙන් තමන් පීඩා විඳින බවද ඔවුහු පැවසූහ.
 
රඹවෙට්ටිකුලම් වැවට අයිතිව කුඹුරු ඉඩම් 2000කට අධික ප්‍රමාණයක් සිවිල් ආරක්ෂක බලකාය මගින් පාලනය කෙරෙන අතර එම ඉඩම් කිහිප අවස්ථාවකදීම ඉල්ලා සිටියද කිසිදු බලධාරියෙකු පියවරක් නොගෙන ඇති බවටත්, අදාල කුඹුරු ඉඩම් සාමාන්‍ය ජනතාවට ලබාදෙන ලෙසට මහවැලි අධිකාරය හා ප්‍රාදේශීය ලේකම් කාර්යාල මගින් දැනුම් දී තිබුණද සිවිල් ආරක්ෂක බලකායෙන් එම කුඹුරු ඉඩම් බලහත්කාරයෙන් පරිහරණය කරන බවටත් උද්ඝෝෂණයේ යෙදුණු ජනතාව පැවසූහ.
 
කුඹුරු ඉඩම් නොලැබුණහොත් එලඹෙන 12 වනදා සියලු ගොවීන් මහවැලි භාර අමාත්‍යංශ ඇතුළු කොළඹ වැටලීමේ දැවන්ත විරෝධතාවක් පවත්වා මාරාන්තික උපවාසයක් ආරම්භ කරන බවටද ගම්වාසීහු වැඩිදුරටත් පැවසූහ.