(ප්‍රියානි මංගලිකා)

නිකවැරටිය කිරින්ද ප්‍රදේශයේ මාලු ඇල්ලීමට ගිය වඩු කාර්මිකයකු වල් අලියෙකුගේ පහර දීමකට ලක්ව අද (10) අලුයම වැව් තාවුල්ලේ දී මරණයට පත්ව ඇති බව පොලීසිය පවසයි.           

මෙසේ මරණයට පත්ව ඇත්තේ නිකවැරටිය කිරින්ද ප්‍රදේශයේ පදිංචි 60 වියැති තිදරු පියෙකි.           

මියගිය අය මෙදින මාලු ඇල්ලීම සඳහා මිතුරන් දෙදෙනෙකු ද සමඟ කිරින්ද මහ වැවට ගොස් ඇති අතර එහිදී අලුයම 1.00ට පමණ මිනීමරු වල් අලියා පන්නාගෙන එන අවස්ථාවේ මිතුරන් දෙදෙනා දිව ගොස් දිවි බේරාගෙන තිබේ.

වල් අලි පහරදීමට ලක් වූ වඩු කාර්මිකයා එම ස්ථානයේ දීම පාගා මරා දමා ඇති බවද පොලීසිය පවසයි.

මියගිය අයගේ සිරුර පිළිබඳව වූ හදිසි මරණ පරීක්ෂණය නිකවැරටිය රෝහලේදී  අද (10) සිදු කිරීමට නියමිතය.