(ඔගස්ටින් ප්‍රනාන්දු)

ආණමඩුව පල්ලම ආයුර්වේද රෝහලේ ප්‍රතිසංස්කරණ කටයුතු සඳහා ගෙනැවිත් තිබු ගොඩනැගිලි ද්‍රව්‍ය සොරාගත්  පුද්ගලයන් දෙදෙනෙකු අද  ( 27 )  ගිරිබාව වරාවැව ප්‍රදේශයේදි අත්අඩංගුවට ගත හැකි වු බව පල්ලම පොලිසිය කියයි.

ආයුර්වේද රෝහලේ ප්‍රතිසංස්කරණ කටයුතු පසුගිය 22දා සිට 25 වන දින දක්වා කාලයේ දි එම කටයුතු නවතා තිබුණි. එම කාලයේ දි කිසියම් පිරිසක් රුපියල් ලක්ෂ 5ක් පමණ වටිනාකම ඇති ගොඩනැගිලි ද්‍රව්‍ය සොරා ගෙන ගොස් ඇති බවට කොන්ත්‍රාත්කරු පල්ලම පොලිසිය වෙත පැමිණිලි කර තිබිණි.

වාහනයක පටවා ගෙන යකඩ කම්බි, සිමෙන්ති ඇතුළු ගොඩනැගිලි ද්‍රව්‍ය තොගයක් කිසිවකු විසින් සොරා ගෙන ගිය බවට ලද තොරතුරු අනුව,  ගිරිබාව වරාවැව ප්‍රදේශයේ පදිංචි තරුණයන් දෙදෙනෙකු අත්අඩංගුවට ගෙන ප්‍රශ්න කර ඇත.  ඔවුන් විසින් සොරා ගෙන ගොස් විකුණා තිබු ගොඩනැගිලි ද්‍රව්‍ය තොගයෙන් රුපියල් ලක්ෂ එකහමාරක් වටිනා තොගයක්  අද ( 27 )සොයා ගත හැකිවු බවත් කියයි.

මෙම කොල්ලයට සම්බන්ධ තවත් දෙදෙනෙකු  අත්අඩංගුවට ගැනීමට පොලිසිය පරීක්ෂණ පවත්වයි.

සැකකරුවන්  ආණමඩුව අධිකරණය හමුවට ඉදිරිපත් කිරීමට නියමිතය