(ක්‍රිෂාන් ජීවක ජයරුක් )

රුහුණ විශ්ව විද්‍යාලයේ සිසුන් පිරිසක් හා එහි අනධ්‍යයන කාර්ය මණ්ඩලයේ සේවකයින් පිරිසක් අතර අද (9) දහවල් ඇති වූ ගැටුමක දී දෙපාර්ශ්වයේම තුවාල ලැබු බව කියන 16 දෙනෙකු මාතර මහ රෝහලට ඇතුළත් කර ඇති බව මාතර මූලස්ථාන පොලීසිය පවසයි.

රෝහල් ගත වී සිටින පිරිස අතර අනධ්‍යයන කාර්ය මණ්ඩලයේ සේවකයකු හා ආරක්ෂක නිලධාරියකු ද සිසුන් 14 දෙනෙකු ද සිටින බව රෝහල් ප්‍රකාශකයකු පැවසීය.

රුහුණ විශ්ව විද්‍යාලයේ මහා ශිෂ්‍ය සංගමයේ සභාපතිවරයා ඇතුළු ශිෂ්‍යනායකයින් කිහිප දෙනෙකුගේ ශිෂ්‍යභාවය එහි විනය පාලක මණ්ඩලයක් විසින් තාවකාලිකව අහෝසි කර තිබෙන අතර ඊට විරෝධය පල කරමින් සිසු සිසුවියන් පසුගිය මාස කිහිපයක සිට විවිධ ක්‍රියාමාර්ග වල නිරත විය.

එම දඩුවම ඉවත් කරන්නැයි ඉල්ලා මේ දිනවල ඔවුන් සත්‍යග්‍රහ ව්‍යාපාරයක නිරත වෙමින් සිටින අතර අද (9) උප කුලපතිවරයා සමඟ සාකච්ඡාවකට සහභාගී වී ආපසු එමින් සිටි අනධ්‍යයන කාර්ය මණ්ඩලයේ සේවකයින් පිරිසක් සමඟ එම සිසුන් බහින් බස් වීමක් ඇති කර ගෙන තිබේ.

එහිදී දෙපාර්ශ්වය අතර ගුටි බැට හුවමාරුවක් සිදු වී තිබෙන බව පොලීසිය සදහන් කරයි.