ප්‍රංශයේ පිරණීස් කඳු පාමුල ස්පාඤ්ඤ දේශ සීමාව ආසන්නයේ "මොන් ද මර්සැන්" පිවිතුරු ගම්මානයකි. ප්‍රංශ ගුවන් හමුදාවේ එක් කඳවුරක් මෙහි පිහිටීම නිසා මුළු රටටම මෙම නගරය වැදගත්ය.  "බොර්ඩෝ" ප්‍රාන්තයට අයත් මෙම නගරයේ ප්‍රංශ ජාතිකයන් 26 දෙනෙකුගේ සහභාගීත්වයෙන් විපස්සනා භාවනා සති අන්තයක් පසුගිය දා සිදු කැරිණි. ජිනීවා ජාත්‍යන්තර බෞද්ධ විහාරයේ ආචාර්ය තවලම ධම්මික හිමියන් හා හල්විටිගල සුජාත හිමියන් මෙම වැඩසටහන මෙහෙයවනු ලැබූහ. 

සතර ඉරියව්වලින් කය මෙහෙයමින් පවත්වන මෙම භාවනා පුහුණුව හා උපදේශන බොහෝ දෙනෙකුට  ජීවිතයට අනුස්මරණීය අත්දැකීමක් එක් කළ බව අපමණ ප්‍රිතියෙන් යුතුව සිහිපත් කළහ.

මේ අතර ස්විට්සර්ලන්තයේ සාන්ත සර්ග් කඳු මුදුන යුරෝපයේ සුප්‍රකට ජූරා කඳු පද්ධතියෙහි දකුණු සීමාවයි. එහි ඉතාම දර්ශනීය කඳු ගම්මානයක් වන  මොන්තරෙට් හි දී දින තුනක විපස්සනා භාවනා වැඩසටහනක් ජිනීවා ජාත්යන්තර බෞද්ධ විහාරය විසින් පසුගියදා සංවිධානය කෙරිණි.

ස්විස් ජාතිකයන් හා ආසියාතික බෞද්ධයන්  සහභාගී වුණු මෙම වැඩ සටහනට සමගාමීව එම බිමෙහි ශීත හා උණුසුම් කාල ගුණයන්ට යෝග්‍ය විශේෂ පැළෑටියක් රෝපණය කිරීම ද සිදු කෙරිණ.

එය භාවනා සිතක් හා ස්වභාව ධර්මය තුළ පැවතිය යුතු අනුයෝජනීය සම්බන්ධතාවය සංකේතවත් කරණ ප්‍රබල අත්දැකීමක් ලෙස සැමගේ අවධානයට ලක්විණි. නිව්ශතෙල් නගරයේ මන්ජු, වාසනා, ප්‍රේමා මහත්ම මහත්මීන් ද ජිනීවාහි සමන්ත, දිමුතු, ලලිත්, සමන්ති හා බණ්ඩාර මහත්ම මහත්මීන් ද  වන්දනා ගමනක අත්දැකීම මෙම රටෙහිදී විඳිමින් බොහෝ දුර බැහැර සිට පැමිණෙමින් මහා සංඝ රත්නයට හා භාවනා කළ යෝගාවචරයන්ට දානය පිළිගැන්වීම ද විශේෂයක් වීය.

ජිනීවා විහාරයේ ආචාර්ය තවලම ධම්මික නාහිමි, හල්විටිගල සුජාත හිමි හා ස්විස් ජාතික ලක්ඛණ හිමි මෙම වැඩසටහන මෙහෙය වූහ.