(අමදෝරු අමරජීව)

වියළි කාලගුණ තත්වයත් සමඟ වෙරුගල් හරහා ත්‍රිකුණාමලය මුහුදට ගලා බසිනා මහවැලි ගගේ ජල මට්ටම සීඝ්‍රයෙන් පහළ බැසීමත් සමඟ, මුහුදු ජලය ගඟ දිගේ කිලෝමීටරයක් පමණ රට තුළට ගලාවිත් එම ජලයට මුසු වීමේ අවදානමක් පවතින බවද මේ වනවිටත් පානීය ජලයෙහි යම් ලවණ ස්වභාවයක් පෙන්නුම් කරන බවද ප්‍රදේශවාසීහු පවසති.

මුහුදු ජලය යම් හෙයකින් මහවැලි ගඟට මුසු වුවහොත්  වෙරුගල් , ඊච්චලන්පත්තු  හා සේරුනුවර  ප්‍රදේශවට පානීය ජලය බෙදා හැරීමේ ගැටලුවක් මතුවිය හැකි බව  ජාතික ජල සම්පාදන හා ජලාප්‍රවාහන මණ්ඩලය කියයි.

මහවැලි ගගේ වැලි ගොඩ දැමීම සඳහා සීමාවකින් තොරව බලපත්‍ර නිකුත් කිරීම නිසා ගඟ හෑරී ඇති බවත්, නියං කාලවලදී ජල මට්ටම අඩු වීමත් සමඟ මුහුදු ජලය ගඟ දිගේ රට තුළට ගලා යාම වැඩි වී ඇති බවත් ජනතාව පවසති. 

මේ සම්බන්ධයෙන් කළ විමසුමකට පිළිතුරු දුන්  ජාතික ජල  සම්පාදන හා ජලාප්‍රවාහන  මණ්ඩලයේ  සේරුනුවර  වැඩ භාර  නිලධාරී  කාවින්ද අසංග සම්පත් මහතා මෙසේ පවසයි.

“මෙතෙක් මුහුදු ජලය මහවැලි ගඟට මුසුවී නැහැ. එහෙම වුණොත් ගැටලුවක් මතු වෙනවා. අපි අවධානයෙන් සිටිනවා” යැයි ද කීය.

කෙසේ වෙතත් මුහුදු ජලය හා ඊච්චලන්පත්තු ජල පොම්පාගාරය අතර කිලෝමීටර් දෙකක් ආසන්නයට පැමිණ ඇතැයිද ඔවුහු පවසති.