(දයාරත්න ඇඹෝගම)

මධ්‍යම සංස්කෘතික අරමුදලේ සේවයේ නිරතව සිටින තමන්ට  දෙසැම්බර් මස වැටුප අද (24) දින නොලැබුණ බව එහි සේවකයෝ පවසති.

මේ හේතුවෙන් මධ්‍යම සංස්කෘතික අරමුදලේ සේවයේ නිරතව සිටින 3000 කට අධික සේවකයන් දැඩි අපහසුතාවයට පත්ව තිබේ.

නත්තල සැමරීමට සූදානමින් සිටින කිතුණු භක්තික නිලධාරීන් සහ සේවකයෝ ද මේ හේතුවෙන් පීඩාවට පත්ව සිටිති.

පසුගිය රජයේ විෂය භාරව සිට ඇමතිවරුන්ගේ අත්තනෝමතික ක්‍රියාකාරකම් හේතුවෙන් මෙම ආයතනය කඩා වැටුණු බව වෘත්තීය සමිති නිලධාරීහු කියති.

මධ්‍යම සංස්කෘතික අරමුදලේ සේවකයන්ට මාසික වැටුප් ගෙවීම සඳහා පමණක් මිලියන 500 කට ආසන්න මුදලක් වැයවන බවත් වෘත්තිය සමිති නියෝජිතයෝ පෙන්වා දෙති.

මේ වනවිට ආයතනයට දරා ගත නොහැකි සේවක පිරිසක් සිටින බවත් ඔවුන්ගෙන් ඵලදායී සේවාවක් ඉටු නොවන බවත් ඔවුහු වැඩිදුරටත් පවසති.

මේ සම්බන්ධයෙන් අප මධ්‍යම සංස්කෘතික අරමුදලේ මුදල් අධ්‍යක්ෂ ආරියරත්න මහතා ගෙන් කළ විමසීමකදී ඔහු කියා සිටියේ පසුගිය පාස්කු ප්‍රහාරයෙන් පසුව දෙස් විදෙස් සංචාරකයන්ගේ පැමිණිම අඩුවීම හේතුවෙන් ආදායම ද අඩු වූ බවයි.

මේ හේතුවෙන් අද (24) දින ලැබුණ ආදායම එක්රැස්කර සේවකයන්ගේ වැටුප් ඔවුන්ගේ බැංකු ගිණුම් වල තැන්පත් කළ බවත් බ්‍රහස්පතින්දා වනවිට ඔවුන්ට සිය සම්පුර්ණ වැටුප් ලබාගත හැකි බවත් ඔහු පැවසීය.