(චමිල් රූපසිංහ)

බස්නාහිර හා දකුණු පළාත් වලට වඩා  මධ්‍යම පළාතේ සෞඛ්‍ය, අධ්‍යාපන හා සංචාරක ආදි ක්ෂේත්‍ර ගණනාවක් පහළින් තිබෙන බවත් මෙම තත්ත්වයෙන් ඉහළට මධ්‍යම පළාත ගෙන ඒමට සැමගේ කැපවීම අවශ්‍ය බව මධ්‍යම පළාත් ආණ්ඩුකාර කීර්ති තෙන්නකෝන් මහතා පවසයි.

මධ්‍යම පළාත් ආණ්ඩුකාර ලෙස අද (7) පළාත් ආණ්ඩුකාර කාර්යාලයේදී වැඩබාර ගැනීමෙන් පසු රාජ්‍යය නිලධාරීන් අමතමින් තෙන්නකෝන් මහතා මේ බව සඳහන් කළේය.

අස්ගිරි පාර්ශවයේ ජ්‍යෙෂ්ඨ කාරක සංඝ සභික, නාථ දේවාල විහාරස්ථානයේ විහාරාධිපති ගොමගොඩ රතනසාර, අස්ගිරි නියෝජ්‍ය පරිවේනාධිපති ඇටිපොළ මහින්ද යන හිමිවරු මෙහිදී පිරිත් සජ්ජායනය කර ආණ්ඩුකාරවරයාට ආශිර්වාද කළහ.

දේශපාලනඥයින් හා රාජ්‍යය නිලධාරීන් වෙත පීඩනයක් එල්ල කර තම ප්‍රශ්න හා ගැටලු වලට විසඳුම් ලබා ගැනීම සඳහා පුරවැසියන් ලෙස ජනතාව පෙළ ගැසිය යුතු බවත්  එසේ වුවහොත් මධ්‍යම පළාත් අද පවතින තත්ත්වයෙන් ඉහළට ගෙන යා හැකි බවද කීර්ති තෙන්නකෝන් මහතා කීය.

පළාත් සභා නවයෙන් අටකම මහජන නියෝජිතයින් නොමැති වීම නිසා පළාතේ ජනතාවගේ ගැටලු විසඳීමේ බාරදූර වගකීම ආණ්ඩුකාරවරු මත සම්පූර්ණයෙන්ම පැටවෙන බවත් මධ්‍යම පළාතේ ද එම තත්ත්වය පවතින බවත් ආණුඩුකාරවරයා සඳහන් කළේය.

සමාජ සාධාරණය, යුක්තිය හා සමාජ තුලිතතාවන් ඉහළට ගෙන ඒම අභියෝගයක් බවත් එය ජය ගැනීම පිණිස සියලු දෙනා එකතු වී වැඩ කළ යුතුව තිබෙන බවත් පළාත් සභාවන්හි අවශ්‍යතා වලට කන්දෙන තත්ත්වයට  මධ්‍යම ආණ්ඩුව පත්කළ යුතු බවත් මධ්‍යම පළාත යම් ප්‍රමාණයකට එය භුක්ති විඳින බවද ආණ්ඩුකාරවරයා එහිදි කීය.

මෙම අවස්ථාවට හිටපු අගමැති දි.මු ජයරත්න, හිටපු කතානායක වි.ජ.මු ලොකුබණ්ඩාර, මධ්‍යම පළාත් සභාවේ සභාපති එල්.ඩී නිමලසිරි, මහනුවර පුරපති කේසර සේනානායක, මාතලේ පුරපති ඩල්ජිත් අළුවිහාරේ,මධ්‍යම පළාත් ප්‍රධාන ලේකම් සුනිල් ප්‍රේමවංශ යන මහත්වරු ඇතුළු පිරිසක් සහභාගී වූහ.