(කුෂාන් ජයවර්ධන)

කැකිරාව අවට ප්‍රදේශවල මත්කුඩු ජාවාරමේ නිරත වූ පුද්ගලයකු සමඟ මත්කුඩු සන්තකයේ තබා ගෙන සිටි තරුණයන් දෙදෙනෙකු අද (18) අත්අඩංගුවට ගත්බව කැකිරාව පොලිසිය පැවසීය.

යුද හමුදා බුද්ධි අංශ නිලධාරීන්ගෙන් ලද තොරතුරකට අනුව කැකිරාව පොලිසියේ දූශණ මර්ධන අංශයේ නිලධාරීන්  කළ ක්ෂණික මෙහෙයුමකදී සැකකරුවන් සහ අදාළ මත් කුඩු තොගය අත්අඩංගුවට ගැනීමට පොලිසියට හැකිව තිබේ.

අත්අඩංගුවට ගත් සැකකරුවන් වයස අවුරුදු 23 ත් 27 ත් අතර වයස්වල පසුවන තරුණයන් බව පොලිසිය පැවසීය. මෙම පිරිස කැකිරාව මල්දෙණිපුර ඔලොම්බෑව සහ  ඔලුකරද යන ප්‍රදේශවල පදිංචිකරුවෝ වෙති.

මත්කුඩු ජාවාරම සම්බන්ධයෙන් අත්අඩංගුවට ගත් පුද්ගලයා ගලෙන්බිදුනුවැව නාමල් පුර ප්‍රදේශයේ පදිංචි 27 හැවිරිදි පුද්ගලයකු බව පොලිසිය කියයි.

කැකිරාව වෙරුංකුලම වැව් රක්ෂිතයේ දී රහසිගත ස්ථානයක මත්කුඩු තොගයක් බෙදාහැරීමට සූදානම් කරමින් සිටියදී ඔහු අත්අඩංගුවට ගෙන තිබේ.

සැකකරු සන්තකයේ තිබී මත්කුඩු ග්‍රෑම් 12.5 ක ප්‍රමාණයක් පොලිස් භාරයට ගෙන ඇති අතර ඔහුගෙන් සිදුකළ ප්‍රශ්න කිරීම්වලදී ලද තොරතුරුකට  අනුව මත්කුඩු සන්තකයේ තබා ගෙන සිටි සැකකරුවන් දෙදෙනා කැකිරාව බස්නැවතුම්පොළ තුළදී අත්අඩංගුවට ගත්බව පොලිසිය කියයි.

එම සැකකරුවන් සන්තකයේ තිබී මත්කුඩු මිලි ග්‍රෑම් 350 ක ප්‍රමාණයක් පොලිස් භාරයට ගෙන තිබේ.

අත්අඩංගුවට ගත් සැකකරුවන් සහ මත්කුඩු තොගය හෙට (19) කැකිරාව දිසා මහේස්ත්‍රාත් අධිකරණය වෙත ඉදිරිපත් කිරීමට නියමිතය.