2023 පෙබරවාරි මස 05 වන ඉරිදා
(රංජිත් රාජපක්ෂ)
නලල්තන්නියේ සිට මාතර දක්වා ධාවනය වූ මෝටර් රථයක් මාර්ගයෙන් ඉවතට ගොස් අඩි 20 ක පමණ ප්‍රපාතයකට පෙරළීමෙන් එහි ගමන් ගත් සිව්දෙනෙක් බරපතල තුවාල ලබා අද (18) දික්ඔය මූලික රෝහලට ඇතුළත් කළබව මස්කෙලිය පොලිසිය පැවසීය.
තුවාලකරුවන්ගෙන් එක් අයෙකු වැඩිදුර ප්‍රතිකාර සඳහා මහනුවර මහ රෝහල වෙත මාරු කර යැවූ බවද පොලිසිය කීය.
මෙම අනතුර සිදු වී ඇත්තේ නල්ලතන්නිය හැටන් ප්‍රධාන මාර්ගයේ මස්කෙලිය කුඩා මස්කෙලිය ප්‍රදේශයේදීය.
මාතර සිට ශ්‍රී පාද වන්දනාවේ පැමිණි තරුණයන් දෙදෙනෙක් සහ තරුණියන් දෙදෙනෙකු ශ්‍රී පාදස්ථානය වැද පුදාගෙන ආපසු මාතර දක්වා ගමන් කරන අවස්තාවේ මෙම අනතුර සිදු වී ඇති බව පොලිසිය සඳහන් කළේය.
මොටර් රථය ධාවනය කළ රියදුරාට නින්ද යාමෙන් මෙම අනතුර සිදු වි ඇති බවත්, අනතුරෙන් මොටර් රථයටද දැඩි අලාභ හානි සිදු වි ඇති බවයි අනතුර පිලිබදව පරික්ෂණ පවත්වන මස්කෙලිය පොලිසිය පැවසීය.
