( දියතලාව - ඩී.කේ.රත්න )

බදුල්ල ස්ප්‍රීංවැලි ප්‍රධාන මාර්ගයේ ස්ප්‍රීංවැලි කෝට්ටේගොඩ ප්‍රදේශයේදී අද (8) හවස 2.30 ට පමණ පොලිස් නිළධාරියෙකු විසින් ධාවනය කරමින් තිබූ යතුරු පැදියක් සහ ලංගම බස් රථයක් මුහුණට මුහුණලා ගැටීමෙන් පොලිස් නිලධාරියා මියගොස් ඇතැයි බදුල්ල පොලීසිය පවසයි.


බදුල්ල පොලීසියට අනුයුක්තව සේවයේ යෙදී සිටි පොලිස් කොස්තාපල් 46615 ඩබ්.එම්.වීරසේන නැමති පොලිස් කොස්තාපල්වරයෙකු මෙම අනතුරින් අවාසනාවන්ත ලෙස මිය ගොස් තිබේ.

මෙම පොලිස් නිලධාරිවරයා බදුල්ල පොලීසියේ සිට ස්ප්‍රීවැලි ප්‍රදේශයට රාජකාරී කටයුත්තක් සඳහා යතුරුපැදියකින් ගමන් කරමින් සිටියදී මෙම අනතුරට ලක්වී ඇත.

සිද්ධියට සම්බන්ධ ලංගම බස් රථය හා බස් රථයේ රියදුරු බදුල්ල පොලීසිය විසින් අත්අඩංගුවට ගෙන තිබේ. බදුල්ල මූලස්ථාන පොලිස් ස්ථානාධිපති ප්‍රධාන පොලිස් පරීක්ෂක වනිගසේකර මහතාගේ උපදෙස් පරිදි බදුල්ල පොලීසියේ රථවාහන අංශයේ නිලධාරීහු මේ පිළිබදව පරීක්ෂණ සිදු කරති.