(ප්‍රසාද් රුක්මල්)

ගිරාදුරුකෝට්ට ගල්පෝරුයායේ ට්‍රැක්ටර් රථ රියදුරකුගෙන් බැංකු කාඩ්පතක් සොරාගෙන ටෙලර් යන්ත්‍රයකින් රුපියල් 95,000 ක් වංචනික ලෙස ලබාගත් තරුණයකු සහ කාන්තාවක අද (4) අත්අඩංගුවට ගත් බව ගිරාදුරුකෝට්ට පොලිසිය පවසයි.

මෙසේ අත්අඩංගුවට ගෙන ඇත්තේ ගිරාදුරුකෝට්ට පදිංචි  25 හැවිරිදි මස්සිනා සහ ගිරාදුරුකෝට්ට නවනගරයේ පදිංචි 39 හැවිරිදි කාන්තාවකි.

මෙම ට්‍රැක්ටර් රථ රියදුරු සහ ඔහුගේ අක්කා විවාහ වූ මස්සිනා එකම නිවසේ පදිංචිව සිටින බවත්, මීට මාස කීපයකට ඉහතදී ට්‍රැක්ටර් රථ රියදුරු ඔහුගේ ට්‍රැක්ටර් රථයක් විකුණා ලබාගත් රුපියල් 450,000 ක් රාජ්‍ය බැංකුව තැන්පත් කර තිබෙන බවද පොලිසිය පවසයි.

පසුව විටින් විට මොහු ගිණුමෙන් මුදල් ලබාගෙන ඇති බවත්, අවසන් වශයෙන් ගිණුමේ රුපියල් 96,000 ක මුදලක් තිබී ඇතැයි පොලිසිය කීය.

පසුව මොහු බැංකු ටෙලර් කාඩ්පත සමඟ එහි රහස් අංකය ඇතුළත් ලිපිය නිවසෙහි අල්මාරියේ තබා කුඹුරට ගිය අතරතුරේ මොහුගේ ගිණුමෙන් මුදල් රුපියල් 95000ක් ලබා ගත් බවට ජංගම දුරකථනයට කෙටි පණිවුඩ දෙකක් ලැබී ඇති බවත් ඒ සම්බන්ධයෙන් ගිරාදුරුකෝට්ට පොලිසියට පැමිණිලි කිරිමෙන් පසුව සැකකරු අත්අඩංගුවට ගෙන ඇත.

පසුව සැකකරුගෙන් හෙළි කරගත් තොරතුරු අනුව සැකකාර කාන්තාව අත්අඩංගුවට ගෙන තිබේ.