(ඩී.ජී.සුගතපාල) 
ශ්‍රී ලංකා පොදු ජන පෙරමුණේ නියෝජිතයන් පිරිසක් අද (03) ගාල්ල දිස්ත්‍රික් නියෝජ්‍ය මැතිවරණ කොමසාරිස් කේ.යූ.චන්ද්‍රලාල් මහතා හමුවී පැමිණිල්ලක් කළහ.
 
ඇල්පිටිය ප්‍රාදේශීය සභාවේ ඡන්ද විමසීම ලබන මස 11දින පැවැත්වීමට  නියමිතව තිබියදී මැතිවරණ නීති රීති උල්ලංඝණය කරමින් එක්සත් ජාතික පක්ෂය විසින්  ඡන්දදායකයින්ට විවිධ දේවල් බෙදාදෙන බව කියමින් ඔවුහු මෙම පැමිණිල්ල ඉදිරිපත් කළහ. 
 
ඇල්පිටිය ප්‍රාදේශීය සභා මැතිවරණයේ ශ්‍රී ලංකා පොදුජන පෙරමුණේ බලය ලත් නියෝජිත නීතීඥ ලලිත් යූ ගමගේ, නීතීඥ නිමල් වලාකුළුආරච්චි සහ ගාල්ල දිස්ත්‍රික් පාර්ලිමේන්තු මන්ත්‍රී නීතීඥ මොහාන් සිල්වා යන මහත්වරුන් විසින් මෙම පැමිණිල්ල ඉදිරිපත් කරන ලදී.
 
ඇල්පිටියේ එක්සත් ජාතික පක්ෂයේ සංවිධායක වත්මන් ආණ්ඩුවේ ඉඩම් ඇමතිවරයා බවද, ඔහු එක්සත් ජාතික පක්ෂ ආධාරකරුවන්ට ඉඩම් ප්‍රතිසංස්කරණ කොමිසමට අයත් වලහන්දූව වත්තේ ඉඩම් කැබලි ලබාදීමට කටයුතු සූදානම් කර ඇති බවද සඳහන් කළ ඔවුහු ඉදිරි සතියේ සමෘද්ධි සහනාධාර ලබාදීමට කටයුතු කර ඇති බවද එය මැතිවරණ නීති රීති උල්ලංඝණය කිරීමක් බවද පැවසූහ.
මෙහිදී නියෝජ්‍ය මැතිවරණ කොමසාරිස්වරයා කියා සිටියේ  මැතිවරණය සඳහා රජයේ දේපල යොදා ගැනීමට ඉඩ නොදෙන අතර මැතිවරණ නීති උල්ලංඝණය කරන අයට විරුද්ධව සියයට සියයක් නීතිය ක්‍රියාත්මක කිරීමට පසුබට නොවන   බවය.
 
රටේ ව්‍යවස්ථාව අනුව සහ අධිකරණයෙන් ලබාදී ඇති නියෝගය අනුව කටයුතු කරන බවද ඡන්ද මධ්‍යස්ථාන 47කදී ඡන්ද විමසීම පැවැත්වෙන අතර ඡන්ද ගණන් කිරීම එම මධ්‍යස්ථානයේදීම කර ප්‍රතිඵල ප්‍රකාශයට පත් කරන බවද නියෝජ්‍ය මැතිවරණ කොමසාරිස් චන්ද්‍රලාල් මහතා කියා සිටියේය.
 
ඇල්පිටිය ප්‍රාදේශීය සභාව සඳහා එක්සත් ජාතික පක්ෂය, එක්සත් ජනතා නිදහස් සන්ධානය, ශ්‍රී ලංකා පොදුජන පෙරමුණ, ප්‍රජාතන්ත්‍රවාදී එක්සත් ජාතික පෙරමුණ සහ ජනතා විමුක්ති පෙරමුණ යන දේශපාලන පක්ෂ පහකින් අපේක්ෂකයන් 85දෙනෙකු නාම යෝජනා බාරදී තිබේ.