(ටෝනි කරුණානායක) 

මෙරට නිෂ්පාදිත ගල්කටස් වර්ගයේ පිස්තෝලයක් සහ විවිධ වර්ගයේ ජීව උණ්ඩ 10 ක් සන්තකයේ තබා ගැනීමේ චෝදනාව සම්බන්ධයෙන් අධිකරණයට ඉදිරිපත් කරන ලද සැකකරුවෙකු ලබන 23 වැනිදා දක්වා රක්ෂිත බන්ධනාගාර ගතකරන ලෙස මිනුවන්ගොඩ මහෙස්ත්‍රාත් කේසර සී.ඒ සමරදිවාකර මහතා අද (08) නියම කළේය.

මිනුවන්ගොඩ පොලිසිය මගින් අත්අඩංගුවට ගෙන අධිකරණයට ඉදිරිපත් කරන ලද මිනුවන්ගොඩ බොරගොඩවත්ත ප්‍රදේශයේ පදිංචි ඒ.ඒ.ඉන්ද්‍රතිස්ස නැමැති සැකකරුව මෙසේ රිමාන්ඩ් බාරයට පත් කෙරුණි .

සැකකරු මිනුවන්ගොඩ බටහිර නිල්පනාගොඩ ප්‍රදේශයේ නිවසකින් කාමරයක් කුලි පදනම මත ලබා ගෙන 

එම කාමරයේ රැඳී සිටියදි අත්අඩංගුවට ගත් බවත් සැකකරු එම කාමරය තුළ සඟවා තිබූ මෙරට  නිෂ්පාදිත ගල්කටස් වර්ගයේ ගිනි අවිය සහ එම අවියට යොදන බෝර 12 වර්ගයේ පතුරම් 07 ක් සහ ටී 56 ගිනි අවිවලට යොදන ජීව උණ්ඩ 03 ක් සොයා ගත් බව පොලිසිය අධිකරණය හමුවේ පැවසීය.

අත්අඩංගුවට පත් එම ගිනි අවිය යොදා ගෙන  සැකකරු අපරාධ සිදු  කර ඇත්දැයි යන්න පරීක්ෂණ සිදු කරන බව පොලිසිය අධිකරණය හමුවේ වැඩිදුරටත් සඳහන් කළ අතර පරීක්ෂණ අවසන් නොමැති බව ද පැවසීය.