(කාංචන කුමාර ආරියදාස)

මොරගහකන්ද ජලාශය සිය ගම්බිම් ඉඩකඩම් දේපළ ලබාදී නැවත පදිංචියට පැමිණි ජනතාවට පොරොන්දු වූ සහන ලබා නොදීම නිසා ඔවුහු දැඩි අසීරුතාවයකට පත්ව සිටින බව සමස්ත ලංකා ගොවිජන සම්මේලනය චෝදනා කර සිටී.

රටේ සංවර්ධනයට සිය ගම්බිම් ගේදොර වතුපිටි පූජා කළ ජනතාවට සහන සලසන්නේ නැතිනම් එම ජනතාව සමග එක්ව අරගලයකට සූදානම් බව සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා විශේෂ මාධ්‍ය හමුවක් කැඳවමින් 07 දින පස්වරුවේ පැවසීය.

මොරගහකන්ද ජලාශයට ඉඩම් ලබාදී නැවත පදිංචි වූ ලග්ගල මාඔය ප්‍රදේශය පදිංචිකරුවන් ඒකරාශී කොට ඔවුන්ගෙන් සමස්ත ලංකා ගොවිජන සම්මේලනය අනුබද්ධ ගොවි සංවිධානයක් ස්ථාපිත  කරමින් පැවැති මාධ්‍ය හමුවේ දී නාමල් කරුණාරත්න මහතා මේ බව සඳහන් කළේය.

මොරගහකන්ද ජලාශය සදහා සිය ගම්බිම් ඉඩකඩම් පරිත්‍යාග කොට ලග්ගල  ප්‍රදේශයේ පදිංචියට පැමිණි ජනතාව මෙහිදී සඳහන් කර සිටියේ තමන්ට වගා කිරීමට ඉඩකඩම් ලබා දුන්නද මෙතෙක් වාරි ජලය නොලැබී ඇති බවත් පානීය ජලය සහ අනෙකුත් අවශ්‍යතා සඳහා මේ වන තෙක් ජල පහසුකම් ලබා නොදී බවුසර මගින් ඉතා සුළු ජල ප්‍රමාණයක් ලබා දීමෙන් සියලු ජල අවශ්‍යතා සපුරා ගැනීමට සිදුව ඇති බවය. 

එමෙන්ම ප්‍රවාහන පහසුකම් පාසල් උසස් අධ්‍යාපන පහසුකම් මෙන්ම වන්දි මුදල් නොලැබූ අය ද තවමත් ගම්මානයේ ජීවත් වන බවයි. 

ඔවුන්ට දැනට ලබාදෙන වියළි සලාක සහල් සහ හාල්මැස්සන් ආහාරයට වත් ගැනීමට නොහැකි ඒවා ලබා දෙන බව ද ජනතාව මෙහිදී සඳහන් කළහ.

එමෙන්ම මොරගහකන්ද ජලාශය නැරඹීමට දිවයිනේ විශාල වශයෙන් ජනතාව පැමිණෙන බවත් එහෙත් එම ප්‍රදේශවල ජීවත්වන ජනතාවට වෙළඳාම් කටයුතු සිදු කිරීමට වත් ජලාශය ප්‍රදේශයට ගමන් කිරීම තහනම් කොට තිබෙන බව ද ගම්මුන් මහවැලි අධිකාරියට චෝදනා එල්ල කළහ.

රටේ සංවර්ධනය සඳහා සිය ගම්බිම් පරිත්‍යාග කොට අනාථයන් බවට පත්ව සිටින ජනතාව පිළිබඳව මීට වඩා වැඩි සැලකිල්ලක් දැක්විය යුතු බව නාමල් කරුණාරත්න මහතා මෙහිදී සඳහන් කළේය.

 එමෙන්ම  එම ජනතාව ඉදිරියේ පැවති විශේෂ මාධ්‍ය හමුවේදී වැඩිදුරටත් නාමල් කරුණාරත්න මහතා කියා සිටියේ මෙම ජනතාව ගම්මානවල සිය දෛනික කටයුතු සිදුකර ගනිමින් ඉතා පහසුවෙන් සිටි ජනතාව  බවය.