(ප්‍රින්ස් රත්නායක)
 
පඹහින්න ප්‍රදේශයේ විවෘත කිරීමට නියමිත නව සතොස වෙළඳසැළ පිහිටි ගොඩනැගිල්ලට වසර දෙකකට ආසන්න කාලයක් කුළිය ගෙවමින් සිටි නමුත් අවුරුදු කාලය තුළදීවත් එය විවෘත කර නැතැයි ප්‍රදේශවාසීහු චෝදනා කරති.
 
පාලන මිලක් යටතේ භාණ්ඩ මිලදී ගැනීමට පාරිභෝගිකයන් මහත් අපේක්ෂාවෙන් සිටියත් මෙවර අවුරුදු සමයේ විශාල ලාභයක් ලැබීමට ආයතනයට හැකිව තිබූ අවස්ථාව මගහරිමින් සිටින බව ඔවුහු පවසති. 
 
වසර දෙකකට ආසන්න කාලයක් පෞද්ගලික හිමිකරුවෙක්ට ආයතන කුලිය ගෙවමින් සිටින බවත්, වෙළඳසැල විවෘත නොකිරීමට හේතුව සේවකයන් බඳවා ගැනීමේ පවත්නා දේශපාලනික කඹ ඇදිල්ලක් බවත් ඇතැමෙක් පවසති. වෙළඳසැළට අවශ්‍ය උපකරණ  බඩුබාහිරාදිය මෙන්ම වෙළඳතොග ද සිංහල අවුරුද්ද එළඹීමට පෙර ආයතනයට ගෙනැවිත් සේවකයින් පිළිවෙළ කරනු දුටු බවත් ඔවුහු පවසති. 
 
මේ සම්බන්ධයෙන් සතොස  මෙහෙයුම් සාමාන්‍යාධිකාරී රොෂාන් හසන්  මහතාගෙන් කළ විමසීමකදී ඒ මහතා මෙසේ කීය. 
 
“ මිනිසුන්ට ඕනෑ දෙයක් කියන්න පුළුවන්. දේශපාලන බලපෑමක් නැහැ. අවශ්‍ය සේවකයින් එකපාරටම අලුතෙන් යොමුකරන්න  බැහැ.  ඒ අය පුහුණු කරන්න ඕනෑ. මුදල් යන්ත්‍රයක් තියලා එකපාරටම සතොසක් අරින්න බැහැ. අක්‍රමිකතා වෙන්න පුළුවන්. ඒවා ජාලගත කිරීම අවශ්‍යයි. මේ මාස කීපය තුළ අපි සතොස වෙළඳසැල් 21 ක් විවෘත කළා. අවුරුද්දට පෙර අපි මෙම පඹහින්න සතොස වෙළඳසැල විවෘත කරන්න උපරිම උත්සාහ දරනවා”
 
වසර දෙකක් පුරා මහජන මුදල්  අපතේ යවමින් සිදුකරනු ලබන නාස්තිය මහජනයා වෙත සිදුකරන තවත් බරක් ලෙස පෙන්වාදෙන ප්‍රදේශවාසීහු කඩිනමින් සතොස විවෘත කරන්නැයි ඉල්ලති.