(ඩී ජි සුගතපාල / සුමතිපාල දියගහගේ)
 
ගාල්ල පොලිස් වසමේ තලාපිටිය ප්‍රදේශයේ නිවසක සඟවා තිබියදී අත්අඩංගුවට ගන්නා ලද ත්‍රිවිධ හමුදා නිල ඇඳුම් සම්බන්ධයෙන් යුද හමුදා පොලිසිය සහ රණවිරු ඇපරල් ආයතනය එක්ව විමර්ෂණයක් ආරම්භ කර තිබේ.
 
ඉකුත් 5 වැනි සහ 6 වැනි දා පොලිසිය විශේෂ සෝදිසි මෙහෙයුමකදී තලාපිටියේ නිවසක ගෝනි 10ක සඟවා තිබූ මෙම නිල ඇඳුම් සහ නිල ඇඳුම් කොටස් විශාල ප්‍රමාණයක් අත්අඩංගුවට ගෙන ඇත. 
 
ඒවා අතර, යුද හමුදා කමිස කලිසම්, කොට කලිසම්, සම්පුර්ණ නිලඇදුම් කට්ටල, හමුදා ටී ෂර්ට්, හමුදා කැප් පැති අවි රැඳවුම් බඳපටි, ලෙන් යාඩ් විශාල ප්‍රමණයක් තිබී සොයා ගනු ලැබ ඇත.
 
ඒවායේ රණවිරු ලංඡනය සහ රණවිරු ඇපරල් ලේබලය තිබූ අතර, පොලිසිය කරන ලද පරීක්ෂණවලදී අනාවරණය වී ඇත්තේ, මෙම නිල ඇඳුම් බියගම ප්‍රදේශයේ රණවිරු ඇපරල් ආයතනයේ නිෂ්පාදන කරන ලද ඒවා බවයි. මෙම අත්අඩංගුවට ගැනීම සම්බන්ධයෙන්, මාධ්‍ය මගින් අනාවරණයවීමෙන් පසු යුද හමුදා පොලිසිය සහ රණවිරු ඇපරල් ආයතනය පැමිණ මෙම විමර්ෂණය ආරම්භ කර ඇත.
 
මෙම නිල ඇදුම් සැකකරුට ලැබුණේ කෙසේ ද , ඒවා ඔහු විසින් වෙනත් පාර්ශවයන්ට ලබා දි තිබේ ද, කුමණ අරමුණක් සඳහා සැකකරු මෙම නිල ඇඳුම් සඟවා තබාගන සිටියේ ද රණවිරු ඇපරල් ආයතනයේ සෙවකයන් විසින් ඔහුට මේවා ගෙනවිත් දී තිබේද, සැකකරු සමග සම්බන්ධතා පැවත්වූ වෙනත් පිරිස් කවුරුන්ද යන්න ආදිය පිළීබඳව විමර්ෂණය කරන බව ගාල්ල පොලිසිය පවසයි.