(බිමල් ශ්‍යාමන් ජයසිංහ)
 
මහමග නතර කර තිබෙන ත්‍රිරෝද රථ සොරාගෙන ඒවා ව්‍යාජ අයුරින් වෙනස් කර විකිණීමේ සංවිධානාත්මක ජාවාරමක නිරත වූ ටෙලිනාට්‍ය නළුවකු ඇතුළු පුද්ගලයින් තිදෙනෙකු රුපියල් කෝටියකට අධික ත්‍රිරෝද රථ සමග අද(16) අත්අඩංගුවට ගත් බව කළුතර අපරාධ ඒකකය පවසයි.
 
එසේ සොරාගත් ත්‍රිරෝද රථ 13ක් පොලිසිය සොයාගෙන ඇත.
 
මීට වසරක පමණ පෙර සිට මහරගම, බදුරලිය, පිළියන්දල, පානදුර, හොරණ, කැස්බෑව හා බොරලැස්ගමුව ආදී ප්‍රදේශවලින් මෙම ත්‍රිරෝද රථ සොරාගෙන ඇතැයි පොලිසිය කියයි.
 
විවිධ ත්‍රි රෝද රථවල ලියාපදිංචි සහතික විවිධ පුද්ගලයන්ගෙන් ඉතා අඩු මිලට ලබාගෙන ඒවායේ චැසි අංක සහ එංජින් අංක සොරාගත් රථවල අංකවලට යොදා වර්ගයද වෙනස් කර ඇතැයි පොලිසිය වැඩිදුරටත් පවසයි.