(හිරාන් ප්‍රියංකර ජයසිංහ)

ආණමඩුවේදී තරුණයකු පුද්ගලයන් තිදෙනෙකුට තියුණු ආයුධයකින් පහරදී  බරපතල තුවාල සිදුකර ඇති බවත් තුවාල ලැබූ පුද්ගලයින් තිදෙනා ආණමඩුව රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා පුත්තලම මූලික රෝහලට මාරු කර යවා ඇති බවත් පොලිසිය කියයි.

මෙසේ තියුණු කැපිම් වලට ලක්ව ඇත්තේ ආණමඩුව නගරයේ ත්‍රී රෝද රථ රියදුරන් දෙදෙනෙකු හා තවත් පුද්ගලයකු බව පොලිසිය කියයි.

තිදෙනෙකුට තියුණු ආයුධයකින් බරපතල තුවාල සිදුකළ සැකකාර තරුණයා වසර කිපයකට පෙර පුද්ගලයකුට තියුණු ආයුධ වලින් පහර  දී ඝාතනය කිරීමේ සිද්දියකට ප්‍රධාන සැකකරු බව පොලිසිය පවසයි.

කාන්තාවක් සම්බන්ධව ඇතිවූ ප්‍රශ්නයක් දුර දිග යාමේන් ත්‍රී රෝද රථ ගාලේ දෙදෙනා සහ අනෙක් තැනැත්තා සැකකාර තරුණයාගේ නිවස ඉදිරියට ගොස් ගැටුමක් ඇති කර ගෙන ඇති බවත් එහිදී නිවසේ සිටි සැකකාර තරුණයා කඩුවක් රැගෙන විත් කඩුවෙන් පහරදී ඇති බවත් පොලිසිය කියයි.

එහිදි එක් අයකුගේ ගෙල ප්‍රදේශයට දරුණු කැපුම් තුවාල සිදුව තිබු  බවත් අනෙක් දෙදෙනාගේ පාදයක් සහ අතක් කපා තිබූ බවත් පොලිසිය පැවැසීය.

සිද්දියට සම්බන්ධ සැකකාර තරුණයා ප්‍රදේශයෙන් පලා ගොස් ඇති බවත් සැකකරු සොයා පොලිස් කන්ඩායම් කිපයක් පරික්ෂණ අරම්භ කර ඇති බව පොලිසිය කියයි.