(බිමල් ශ්‍යාමන් ජයසිංහ)

කැස්බෑව ජාලියගොඩ මාර්ගයේ අනතුරුදායක ලෙස තනි රෝදයෙන් යතුරු පැදි පැදවූ තරුණයන් තිස් දෙදෙනා ඇප මත මුදා හරින ලෙස කැස්බෑව අධිකරණයේ අතිරේක දිසා විනිසුරු සහ මහේස්ත්‍රාත් රුවන්තිකා මාරපන මහත්මිය අද නියෝග කළාය.

තරුණ ජීවිත ආරක්ෂා කර ගැනීම සඳහා පිලියන්දල පොලිසිය ගත් ක්‍රියාවට ප්‍රශංසා කරමින් විවෘත අධිකරණය ඇමතු මහේස්ත්‍රාත්වරිය ඔවුන්ගේ දෙමාපියන්ගේ හැසිරීම සම්බන්ධයෙන් සිය අප්‍රසාදය පල කර සිටියාය.

මෙලෙස ඇප මත මුදා හරිනු ලැබුවේ කොට්ටාව , පන්නිපිටිය හා මොරටුමුල්ල පදිංචි වයස අවුරුදු 18 හා 32 අතර පුද්ගලයන් තිස් දෙදෙනෙකි.

රුපියල් ලක්ෂය බැගින් වූ ශරීර ඇප දෙකක් මත මුදා හරින ලෙස නියෝග කළ මහේස්ත්‍රාත්වරිය එම ඇප අධිකරණ බල සීමාවේ පදිංචිකරුවන් විය යුතු බව වැඩි දුරටත් නියෝග කරන ලදී.