(අජිත්ලාල් ශාන්තඋදය)

අඩු ආදායම්ලාභී ග‍්‍රාමීය ජනතාවගේ ජීවන තත්ත්වය ඉහළ නැංවීමත් ඔවුන් ජීවත්වන ප‍්‍රදේශවල පොදු මූලික අවශ්‍යතා සපුරාලීමේත් අරමුණු ඇතිව පිහිටවූ ‘‘ගැමිදිරිය’’ ව්‍යාපෘති මීට වසර තුනකට පමණ පෙර හිටි හැටියේ නවතා දැමීමෙන් පසු ජනතාවගේ තැන්පත් මුදල් ඇතුළු සෙසු පහසුකම් නැවත ඉල්ලා කළ සියලූ ප‍්‍රයත්නයන් මේ වනවිට බලධාරීන් විසින් අමතක කර දමා ඇතැයි ‘‘ගැමිදිරිය’’ ක‍්‍රියාකාරීහූ පවසති.

ලෝක බැංකු ව්‍යාපෘතියක් ලෙස මෙම ‘‘ගැමිදිරිය’’ ව්‍යාපෘතිය මුලින් ම ලංකාවේ ඒක පුද්ගල ආදායම ඉතා පහළ මට්ටමක පැවති පළාත් සහ දිස්ත‍්‍රික්ක ඉලක්ක කරගෙන ආරම්භ විය. ලෝක ජනගහනයෙන 17%ක ඒක පුද්ගල දෛනික ආදායම ඇමරිකා ඩොලර් 1.25ට වඩා අඩුවීම සැලකිල්ලට ගෙන ලෝක බැංකුව තුන්වැනි ලෝකයේ රටවල් වලට මෙම ව්‍යාපෘතිය හඳුන්වා දෙනු ලැබීය.

විරැකියාවෙන් යුතු ග‍්‍රාමීය ජනතාවට ස්වයං රැකියා අවස්ථා සලසා ගැනීම, නිෂ්පාදන ආර්ථික රටාවක් ඇති කරගෙන වැඩි ඉල්ලූමක් ඇති භාණ්ඩ ගෘහස්ථ මට්ටමින් නිෂ්පාදනය කිරීම, සේවාවන් සැපයීමෙන් අඩු ආදායම්ලාභීන්ගේ ආර්ථිකය නැංවීම මෙහි පරමාර්ථයන් විය.

ඒ සදහා ජනතාවගේ සහභාගිත්වයෙන් යුතුව ඉතුරුම් සහ ණය ක‍්‍රමයක් අරඹා ඉතිරිකිරීම හුරුකර සාමාජිකයන්ගේ ආර්ථික තත්ත්වය ඉහළ නංවන සැලසුම් තෝරාගෙන අඩු පොලියට සහ හීනවීමේ ශේෂය මත පොලී අයකර ණය ද ලබාදුන්නේ ය.

එසේම ගමේ පොදු අවශ්‍යතාවන පාරවල්, සුලූ වාරිමාර්ග, පානීය ලිං සැකසීම, විදුලි බලය ලබාගැනීමේ ක‍්‍රම, බහුකාර්ය ගොඩනැගිලි ඉදිකිරීම වැනි පොදු වැඩ ද සිදුවිය. ඒවා සදහා 80%ක මුදල් ව්‍යාපෘතියෙන් ද, 10%ක් ජනතා මුදල් ද, 20%ක් ජනතාවගේ ශ‍්‍රම සහභාගිත්වයෙන් යුතුව ද නිම කැරිණි.