(නිමල් ජයරත්න)

වරෙන්තුකරුවෙකු අත්අඩංගුවට ගැනීමට පොලිස් පොතෙහි සටහන් යොදා වැලිකන්ද පොලිසියෙන් බැහැරව ගිය පොලිස් රථ වාහන අංශයේ නිලධාරින් දෙදෙනෙකු පිස්තොල දෙකක්, උණ්ඩ 18 ක් සහ මෝටර් රථයක් සමඟ අද (15) සවස අත්අඩංගුවට ගත් බව අම්පාර පොලිස් විශේෂ කාර්ය බලකාය පවසයි.

කල්මුණේ ප‍්‍රදේශයේදී අත්අඩංගුවට ගත් මෙම රථ වාහන පොලිස් නිලධාරින් දෙදෙනා සිවිල් ඇඳුමින් සිට ඇති අතර ඔවුන් සැකපිට අත්අඩංගුවට ගෙන පරීක්ෂණ කටයුතු සිදු කරමින් සිටින බව අම්පාර පොලිස් විශේෂ කාර්ය බලකායේ උසස් නිලධාරියෙකු සඳහන් කළේය.

මෙම රථවාහන පොලිස් නිලධාරින් දෙදෙනා අද උදැසන පොලිස් පොතෙහි සටහන් යොදා පිටව ගොස් ඇත්තේ වැලිකන්ද සිංහපුර ප‍්‍රදේශයේ පදිංචි වරෙන්තු කරුවෙකු අත්අඩංගුවට ගැනීමට යන බව සටහන් කරමිනි.

සිංහපුර ප‍්‍රදේශයේ පදිංචි වරෙන්තුකරුවෙකු අත්අඩංගුවට ගැනීමට යන බව පවසා පොතෙහි සටහනක්ද යොදා සිවිල් ඇඳුමින් සැරසි පිස්තෝල දෙකක්ද සමඟ මෝටර් රථයකින් කල්මුණේ ප‍්‍රදේශයට පැමිණීමට හේතුව කුමක්දැයි සොයා බලන බව අම්පාර පොලිස් විශේෂ කාර්ය බලකායේ උසස් පොලිස් නිලධාරියෙකු පැවසීය.

වැලිකන්ද පොලිස් ස්ථාධිපතිවරයා පැවසුවේ එම සිද්ධිය පිළිබඳව මේ වන විට පොළොන්නරුව ජ්‍යෙෂ්ඨ පොලිස් අධිකාරීවරයාගේ උපදෙස් පරිදි පරීක්ෂණ කටයුතු අරම්භ කර ඇති බවයි.

මෙම සිද්ධිය සම්බන්ධ වැඩිදුර පරීක්ෂණ කටයුතු අම්පාර විශේෂ කාර්ය බලකාය සහ වැලිකන්ද පොලිස් ස්ථානය එක්ව සිදු කරන බව එහි පොලිස් නිලධාරියෙකු සඳහන් කළේය.