2023 පෙබරවාරි මස 04 වන සෙනසුරාදා
බිමල් ශ්‍යාමන් ජයසිංහ
කඩුවෙල නගරයේ රන් අබරණ වෙළඳසැලකට අද (4) ගිනි අවි රැගෙන කඩා වැදුණු පුද්ගලයින් දෙදෙනෙකු වෙඩි ප්‍රහාරයක් එල්ල කර රුපියල් ලක්‍ෂ ගණනාවක රන් ආභරණ කොල්ලකා යතුරු පැදියකින් පලාගොස් ඇතැයි නවගමුව පොලිසිය පවසයි.
කොල්ලකෑ රන් ආභරණ අතර කරමාල, තැලි සහිත මාල හා අත්පළදනා ද වන බව පොලිසිය කියයි.
දහවල් 12.15 ට පමණ ආරක්‍ෂක හිස්වැසුම් පැළද යතුරුපැදියකින් පැමිණි මොවුන් රන් වෙළඳසැලේ විදුරු දොරෙන් ඇතුළු වී එහි දොර වසා විදුරු කබඩි වලට වෙඩි ප්‍රහාරයක් එල්ල කර එහි සේවකයින් බියවද්දා විකිණීමට තබා තිබු රන් අබරණ පෙටිටි පිටින් රැගෙන ගොස් ඇතැයි පොලිසිය පවසයි.
විනාඩි පහකටත් අඩු කාලයක් මෙම කොල්ලය සදහා ගතවි ඇති අතර කොල්ලකන ලද රන් අබරණ පෙටිටි යතුරුපැදියේ මැද තබාගෙන පලා ගොස් ඇතැයි පොලිසිය වැඩිදුරටත් සදහන් කරයි.
සිදුකල වෙඩි ප්‍රහාරයෙන් කිසිවෙකුටත් තුවාල සිදුව නොමැති අතර සිද්ධිය සම්බන්ධයෙන් වැඩිදුර පරීක්ෂණ පවත්වයි.
ඡායාරූපය - බුද්ධික කුමාරසිරි
