( පුෂ්පකුමාර ජයරත්න )

කොවිඩ් 19 වයිරසය ආසාදනය වීමෙන් වළක්වා ගැනීමට පුද්ගලයන් විෂබීජහරණය කිරීම සඳහා නිර්මාණය කළ විෂබීජ හරණ කුටි දෙකක් කුරුණෑගල නගරාධිපති තුෂාර සංජීව විතාරණ මහතාගේ මෙහෙයවීමෙන් අද කුරුණෑගල මූලස්ථාන පොලීසියට සහ කුරුණෑගල ශික්ෂණ රෝහලට පරිත්‍යාග කෙරිණි.

නගරාධිපති තුෂාර සංජීව විතාරණ මහතාගේ මහතාගේ ඉල්ලීමකට අනුව දොඩම්ගස්ලන්ද , පොල්ගහවෙල සහ ඉබ්බාගමුව පදිංචි  චන්දිම වීරසිංහ , දර්ශන තෙවරප්පෙරුම සහ සංඛ සචිත් යන තරුණයන් තිදෙනා එක්ව මෙම විෂබීජ හරණ කුටි නිර්මාණය කර තිබේ .

මෙම එක් විෂබීජහරණ කුටියක් නිපදවීම සඳහා රුපියල් ලක්ෂ තුනක පමණ මුදලක් වැයවී තිබෙන අතර නගරාධිපති විතාරණ මහතා ඒ සඳහා අවශ්‍ය මුදල් සම්පාදනය කර දී තිබේ .

කුරුණෑගල මූලස්ථාන පොලීසිය සහ කුරුණෑගල ශික්ෂණ රෝහල නිරන්තරයෙන්ම දිනපතා විශාල පිරිසක් ගැවසෙන ස්ථානයක් වන අතර එහි සේවය කරන පොලිස් නිලධාරීන්ගේ සහ වෛද්‍ය කාර්ය මණ්ඩලවල ආරක්ෂාව වෙනුවෙන් මෙම කුටි නිපදවා පරිත්‍යාග කිරීමට අදහස් කළ බව නගරාධිපති විතාරණ මහතා පැවසීය .

මෙවැනිම කුටියක් කුරුණෑගල නගර සභාවේද ක්‍රියාත්මක කර ඇති බවද ඒ මහතා සඳහන් කළේය .

කුරුණෑගල මූලස්ථාන පොලීසිය වෙත විෂබීජ හරණ කුටිය පරිත්‍යාග කළ අවස්ථාවට වයඹ පළාත් බාර ජ්‍යෙෂ්ඨ නියෝජ්‍ය පොලිස්පති රවී විජේගුණවර්ධන මහතා සමග කුරුණෑගල මහා නගර සභාවේ ආණ්ඩු පක්ෂයේ නාගරික මන්ත්‍රීවරුන් මෙන්ම  විපක්ෂයේ එක්සත් ජාතික පක්ෂ  නාගරික මන්ත්‍රීවරු පිරිසක්ද සහභාගි වූහ .