(ක.ග කරුණාරත්න)

සැබෑ රත්තරන් බවට අඟවා කාන්තාවකට වර්ණාලේපිත ව්‍යාජ ලෝහ කැබලි ලබාදී රුපියල් ලක්‍ෂ 15ක මුදලක් වංචා කිරීමේ සිද්ධියක් සම්බන්‍ධයෙන් අධිකරණයේ විභාග වූ නඩුවක වරදකරුවන් වූ චූදිතයින් දෙදෙනෙකුට දඬුවම් නියම කළ හිඟුරක්ගොඩ මහේස්ත්‍රාත් සනත් නානායක්කාර මහතා එක් අයෙකුට වසර දෙක බැගින් බරපතල වැඩ සහිත සිර දඬුවම් සහ පැමිණිලිකාරියට රුපියල් ලක්‍ෂය බැගින් රුපියල් ලක්‍ෂ දෙකක වන්දි මුදලක් ගෙවන ලෙසට අද (16) නියෝග කළේය.

චූදිතයින් වන්දි මුදල නොගෙවන්නේ නම් මාස 12 බැගින් සිර දඬුවමකට යටත් කරන ලෙසටද නියෝග කෙරිණි.

මෙවැනිම චෝදනාවක් සම්බන්‍ධයෙන් විත්තිකරුවන් දෙදෙනාට අධිකරණය මගින් නියම කර තිබූ වසර දෙකක අත්හිට වූ සිර දඬුවමක්ද අද දිනයේ පටන් ක්‍රියාත්මක කරන ලෙසටද අධිකරණයෙන්  නියෝග කරනු ලැබීය.

ඊට අමතරව එක් අයෙකුට රුපියල් 3000 බැගින් රුපියල් 6000 ක දඩ මුදලක්ද ගෙවන ලෙසට මහේස්ත්‍රාත්වරයා නියෝග කළේය.

මෙසේ දඩ හා සිර දඬුවම් නියම වූයේ කැකිරාව , මඩාටුගම , දුනුමඩලාව පදිංචි බන්දුහාමිගේ ආරියදාස සහ පුත්තලම , කොට්ටුකච්චිය , මැල්ලන්කුලම , අංක 53 ලිපිනයේ පදිංචි රත්නායක මුදියන්සේලාගේ කපිල බණ්ඩාර යන විත්තිකරුවන් දෙදෙනාටය.

2012 වසරේ ජූනි මස 11වැනි දින හෝ ඊට ආසන්න දිනයකදී කඩුගන්නාව , කඩවත්ගම , අංක 48 ලිපිනයේ පදිංචි පිටවල රාජපක්‍ෂගේ දමයන්ති ඒකනායක යන පැමිණිලිකාරියට මැදිරිගිරිය පොලිස් වසමේදී සැබෑ රත්තරන් බවට හඟවා වර්ණාලේපිත ව්‍යාජ ලෝහ කැබලි ලබාදී රුපියල් ලක්‍ෂ 15ක මුදලක් වංචා කිරීමේ සිද්ධියක් පොලොන්නරුව විශේෂ අපරාධ විමර්ශන අංශයට ලැබුණු පැමිණිල්ලක්  සම්බන්‍ධයෙන් විමර්ශන සිදුකර විත්තිකරුවන්ට එරෙහිව අධිකරණයේ   චෝදනා ගොනුකරනු ලැබ දීර්ඝ නඩු විභාගයෙකින් පසුව විත්තිකරුවන් අදාල චෝදනාවලට වරදකරුවන් බවට ඔප්පුවීමෙන් පසුව මහේසත්‍රාත්වරයා මෙම දඬුවම් නියම කරනු ලැබීය.

නීතිඥ සමිතා ජයසේකර මහත්මිය විත්තිකරුවන් වෙනුවෙන් පෙනී සිටියාය.