2023 ජනවාරි මස 31 වන අඟහරුවාදා
‘කාන්තාවන්ට ශක්තියක් වෙන්න ආණ්ඩුවට හැකියාව ලැබුණා’
(නිමල කොඩිතුවක්කු)
මෙයට පෙර තිබූ කිසිම ආණ්ඩුවක් යටතේ කාන්තාවන් ශක්තිමත් කරන්න කිසිදු වැඩකටයුත්තක් සිදුකර නොමැති බවත් බිම් මට්ටමේ කාන්තාවන්ට නොලැබුණු ශක්තියක් ලබාදිමට වත්මන් ආණ්ඩුවට හැකියාව ලැබී ඇති බවත් අග්‍රාමාත්‍ය රනිල් වික්‍රමසිංහ මහතා කොළඹ දී අද (10) පැවසීය.
වත්මන් රජයේ මෙම වැඩපිළිවෙළ හේතුවෙන් ඊළඟ අවුරුදු කිහිපය තුළදී කාන්තාවන් දේශපාලනික සහ ආර්ථික වශයෙනුත් ඉදිරියට එනු ඇති බවද අග්‍රාමාත්‍ය රනිල් වික්‍රමසිංහ මහතා සඳහන් කළේය.
අග්‍රාමාත්‍ය රනිල් වික්‍රමසිංහ මහතා මේ බව පැවසුවේ අරලියගහ මන්දිරයේ පැවති ‘ධනාභිමාණ’ කාන්තා වැඩමුළුවේ ප්‍රධාන ආරාධිතයා ලෙස එක්වෙමිනි.
එහිදී අදහස් දැක්වූ අග්‍රාමාත්‍ය රනිල් වික්‍රමසිංහ මහතා වැඩිදුරටත් මෙසේ ද කීවේය.
මේ අවුරුද්ද ලංකාවේ කාන්තාවන්ට විශේෂ අවුරුද්දක් වනවා. ලංකා ඉතිහාසයේ පළමු වතාවට විශාල කාන්තා නියෝජනයක් පළාත් පාලන ආයතන වලට ලැබිලා තියෙනවා.
මෙයට පෙර එම එම නියෝජනය තිබුණේ සියයට එකත් දෙකක් වගේ ප්‍රතිශතයකිනුයි. මේ අලූත් ක්‍රමවේදය අනුව සියයට 25ක පමණ නියෝජනයක් අපි බලාපොරොත්තු වුණා. කෙසේ වුණත් සියයට විසිදෙකක් පමණ මේ වනවිට කාන්තා නියෝජනයක් ලැබිලා තියෙනවා.
හැම පළාත් පාලන ආයතනයක්ම අද කාන්තාවන් නියෝජනය කරනවා. මෙයට පෙර බිම් මට්ටමින් එම නියෝජනය තිබුණේ නැහැ. බිම් මට්ටමට නායකත්වය දෙන්න අද කාන්තාවන් සිටිනවා.
අද කාන්තාවන්ට මෙම නියෝජනය හිමිවෙලා තියෙන්නේ එක්සත් ජාතික පක්සය ගත් තීරණයක් නිසයි. පළාත් පාලන ආයතන වලට සියයට 25ක කාන්තා නියෝජනයක් ඕනෑ කියලා අපි තීරණය කරලා මෙම කටයුතු ඉදිරියට ගෙන ගියා.
බිම් මට්ටමේ නියෝජිතයන් වෙලා පමණක් මදි. බිම් මට්ටමේ නියෝජිතවරියන්, අනික් කාන්තා නායිකාවන් අපි ශක්තිමත් කළ යුතුයි. එම වැඩපිළිවෙළ මෙහෙයවිම අපේ වගකිමක් වනවා.
