(ඩී.ජී.සුගතපාල)
 
ඇල්පිටිය ප්‍රාදේශීය සභාවට තේරී පත්වූ සභිකයින්ගේ නාම ලේඛනය මේ වනතුරු ගැසට් කිරීමට නොහැකිවී ඇතැයි මැතිවරණ කොමිසම පවසයි.
 
සමානුපාතික නියෝජනය යටතේ එක්සත් ජනතා නිදහස් සන්ධානයෙන් තෝරාපත් කරනු ලබන සභිකයින්ගේ නාම ලේඛනය මෙතෙක් එවා නොමැති බව මැතිවරණ කොමිසමේ නිලධාරියෙක් පැවසීය.
 
සභිකයින් 15කුගෙන් සමන්විතවූ  ඇල්පිටිය ප්‍රාදේශීය සභාව සඳහා නව මැතිවරණ ක්‍රමය යටතේ ඉකුත් 11වන දින පවත්වන ලද මැතිවරණයේදී කොට්ඨාස මට්ටමින් පොදුජන පෙරමුණට සභික ධුර 17ක් හිමිවිය. සමානුපාතික නියෝජනය යටතේ එක්සත් ජාතික පක්ෂයට සභිකධුර 7ක්ද එක්සත් ජනතා නිදහස් සන්ධානයට සභික ධුර 3ක්ද ජනතා විමුක්ති පෙරමුණට සභික ධුර 2ක් හිමිවිය.ඒ අනුව සම්පූර්ණ සභික සංඛ්‍යාව 29කි.
 
සමානුපාතික නියෝජනය යටතේ තෝරා පත් කරනු ලබන සභිකයින්ගේ නම් ඒ ඒ පක්ෂවලින් නම්කර එවිය යුතු වුවත් එක්සත් ජනතා නිදහස් සන්ධානය විසින් එම පක්ෂයෙන් නම් කරනු ලබන සභිකයින්ගේ නම් මෙතෙක් දන්වා එවා නොතිබීම හේතුවෙන් ගැසට් පත්‍රයට යැවීම ප්‍රමාදවී ඇතැයි ගාල්ල දිස්ත්‍රික් නියෝජ්‍ය මැතිවරණ කොමසාරිස් කාර්යාලයේ උසස් නිලධාරියෙක් පැවසීය.