2023 පෙබරවාරි මස 08 වන බදාදා
(විජේරත්න රත්නායක සහ පාලිත ආරියවංශ)
හාලිඇල ඇටම්පිටිය වේල්ලෙවෙල ප්‍රදේශයේ ඉදිකෙරුණු ඇටම්පිටිය ජල යෝජනා ක්‍රමය අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් අද (17)විවෘත කෙරිණි.
නාගරික සංවර්ධන ජල සම්පාදන හා නිවාස පහසුකම් අමාත්‍යාංශයේ ප්‍රතිපාදන මත රුපියල් මිලියන 2240 ක වියදමින් මෙය ඉදිකරන ලදී.
හාලිඇල ප්‍රාදේශීය ලේකම් කොට්ඨාසයේ ප්‍රතිලාභීන් 15,000 කට පිරිසිදු පානීය ජලය ලබාදීමේ අරමුණින් මෙය ඉදිකෙරිණි.
මෙම ජල යෝජනා ක්‍රමයෙන් හාලිඇල කොට්ඨාසයේ ඇටම්පිටිය, ඌව මහවෙලගම, නෙළුදණ්ඩ, දෙහිවින්න, හින්නාරංගොල්ල, නිළිඅතුගොඩ, කුඩුමහුවෙල, නෙළුව, පල්ලේගම, මාලිගාතැන්න, වෑපස්සාවෙල සහ කටුගහ යන ග්‍රාම නිලධාරී වසම්වල ජල පහසුකම් නොමැති ජනතාවට පානීය ජලය සැපයීමට නියමිතය.
උමාඔය බහුකාර්ය සංවර්ධන ව්‍යාපෘතිය යටතේ ඉදිකරන ලද පුහුල්පොල ජලාශයෙන් ජලය සපයාගන්නා මෙම ව්‍යාපෘතිය පොම්පාගාර, ජල පිරිපහදු කිරීමේ පහසුකම්, ගබඩා ටැංකි හා කිලෝමීටර් 92 ක ජලනල මාර්ගයකින් සමන්විතය. එසේම මෙමඟින් දිනකට ජලය ඝණ මීටර් 3000 ක් පිරිපහදු කිරීමේ හැකියාවක්ද ඇත.
මෙම අවස්ථාවට අධිකරණ, මානව හිමිකම් හා නීති ප්‍රතිසංස්කරණ අමාත්‍ය නිමල් සිරිපාල ද සිල්වා, පාර්ලිමේන්තු මන්ත්‍රීවරුන් වන ඩිලාන් පෙරේරා, තේනුක විදානගමගේ, ඌව පළාත් ආණ්ඩුකාරවර අධිනීතීඥ රාජා කොල්ලුරේ යන මහත්වරු ඇතුළු විශාල පිරිසක් සහභාගී වූහ.
(ඡායාරූප - පාලිත ආරියවංශ)
(ඡායාරූප - විජේරත්න රත්නායක)
