අනීෂා මානගේ


කුලියට ගන්නා මුවාවෙන් අයිතිකරු රවටා රුපියල් ලක්ෂ හැත්තෑවක් පමණ වන සුඛෝපබෝගි වෑන් රථයක් සොරකම් කර අංක තහඩු වෙනස් කර අලෙවි කර තිබියදී තංගල්ල කොට්ඨාස සංවිධානාත්මක අපරාධ මැඩලීම් ඒකකයේ නිළධාරින් විසින් රථයේ රියදුරු සමඟ අත්අඩංගුවට ගෙන ඇත.


මෙලෙස අත්අඩංගුවට ගනු ලැබූවේ සෞඛ්‍ය අමාත්‍යංශයේ හිටපු සම්බන්ධීකරණ නිලධාරියකුගේ රියදුරෙක් ලෙස සේවය කරන බෙලිඅත්ත දියඇල ප්‍රදේශයේ පදිංචි අයෙකි. 


මෙම සුඛෝපබෝගී වෑන් රථය ත්‍රිකුණාමලය නිලාවැලි ප්‍රදේශයේ ව්‍යාපාරිකයාගෙන් දිනකට රුපියල් 5000/- බැගින් වූ මාසික කුලී පදනම මත නිලාවැලි ප්‍රදේශයේ පදිංචි පුද්ගලයකු විසින් ලබාගෙන ඇත. 


ඊට පෙරද දෙවාරයක්ම මෙම පුද්ගලයා දිනකට රුපියල් පන්දහස බැගින් දින දෙකක් මෙම වෑන් රථයම කුලියට ගෙන රුපියල් 10000/- මුදලක් සමඟ නැවත අයිතිකරුට රථය භාර දී තිබේ.

මෙසේ මාසික පදනම මත දුන් වාහනයට කුලී නොගෙවීම නිසා විශ්වාසය කඩ කිරීම හේතුවෙන් ඔහුට විරුද්ධව රථයේ අයිතිකරු විසින් කුච්චවේලි පොලිස් ස්ථානයේ පැමිණිල්ලක් ඉදිරිපත් කර ඇත. ඒ අනුව එම පොලිස් ස්ථානය විසින් සැකකරුට විරුද්ධව නඩු පවරා තිබී ඇත.


වෑන් රථය අත්අඩංගුවට ගන්නා අවස්ථාවේදී (WP)PD 3172 ලෙස ව්‍යාජ අංක තහඩුවක් යොදා තිබී ඇති අතර ව්‍යාජ ආදායම් බලපත්‍රයක් සහිතව හා රක්ෂණ ආවරණයක් නොමැතිව සෞඛ්‍ය දෙපාර්තමේන්තුවේ නිළ ලාංඡනය රථයේ ඉදිරිපස ප්‍රදර්ශනය කර තිබී ඇත.

අත්අඩංගුවට ගත් රථයේ රියදුරුගෙන් කරන ලද ප්‍රශ්න කිරීම් වලදී ඔහු මෙම රථය ලක්ෂ දහයක මුදලකට සපුගස්කන්ද ප්‍රදේශයේ පුද්ගලයකුගෙන් මිලට ගෙන තැරුව්කරු සඳහා අමතරව තවත් රුපියල් ලක්ෂ තුනක මුදලක් ලබා දී ඇතැයි අනාවරණය වී තිබේ.