මනුල වික්‍රම
 
අනුරාධපුර නගරය හා අවට පිරිපහදු කළ ජලය ලෙස ප්‍රවාහනය කර විකුණනන්නේ    කිසිදු ප්‍රමිතියක් නොමැතිව අජිනෝමොටෝ නැමති රස කාරකය යොදා නැවුම්  රසය දැනෙන පරිදි සැකසු ව්‍යාජ ජලය බවට මහ නගර සභාව අනාවරණය කර ගෙන තිබේ.

උතුරුමැද පළාතේ වර්තමානයේ භූගගත ජලය කිවුල් වීමත් වකුගඩු ආසාධනය නිසාත් ජනතාව සම්පූර්ණයෙන්ම පාහේ භාවිතා කරන්නේ ප්‍රති ආශ්‍රැතික ජල පෙරණ මගින් පිරිපහදු කළ ජලයයි. 

නාගරිකව සේම ග්‍රාමීයව ද ප්‍රති ආශ්‍රැති ජල පෙරණ පොදුවේත් පෞද්ගලිකවත් පවත්වාගෙන යන අතර නගරබද කුඩා ලොරි රථවලින් නිවෙස්වලට ජලය රැගෙන ගොස් බෙදාහරින වෙළඳ පිරිසක් සිටීයි.

මෙම අය බෙදා හරින ජලය පිළිබඳ ලැබුණු පැමිණිලි රැසක් සැළකිල්ලට ගත් අනුරාධපුර නගරාධිපති එච්.පී.සෝමදාස මහතා නගරයේ පානීය ජලය බෙදාහරින ව්‍යාපාරිකයින් රැස් කළේය.

මෙහි දී සැබෑ ලෙසම ජලය පිරිපහදුවට ලක්කර ප්‍රමිතියෙන් බෙදාහරින වෙළඳුන් ඔවුන්ට ලද තොරතුරු හෙළි කළහ.

එහිදී වැව් ජලය හා ළිං ජලය පිරිපහදු කර රසකාරක  යොදා නැවුම් රසය ජනනය වන පරිදි විකුණන අයුරු ඔවුහු පැහැදිලි කළහ.

එමෙන්ම ජලසම්පාදන මණ්ඩලයේ අනුමැතිය ඇති බවට සහතික කර ඇතැයි ජල වෙළඳුන් ප්‍රචාරය කරගෙන ගියද ඔවුන් එක්වරක් පමණක් ජල සාම්පලය පරීක්ෂා කර වාර්තාවක් ලබාගන්නවා මිස  අඛණ්ඩ පරීක්ෂාවක් නොවන බව නගරාධිපතිවරයාට මහජන සෞඛ්‍ය පරික්ෂකයින් වාර්තාකර තිබේ.