(කාංචන කුමාර ආරියදාස)
 
දඹුල්ල - කුරුණෑගල ප්‍රධාන මාර්ගයේ ගලේවෙල පුවක්පිටිය  ප්‍රදේශයේදී සහ කනාදන  ප්‍රදේශයේදී අද (11) එකම වෙලාවේ සිදුවූ රිය අනතුරු දෙකකින් යුද හමුදාවේ සෙබළුන් දෙදෙනකු හා යතුරුපැදිකරුවෙකු  මියගොස් තවත් පුද්ගලයෙකු බරපතළ තුවාල ලබා ඇතැයි ගලේවෙල පොලිසිය කියයි.
 
එක අනතුරක් සිදුව ඇත්තේ ගලේවෙල දඹුල්ල ප්‍රධාන මාර්ගයේ පුවක්පිටිය ප්‍රදේශයේ දීය . ත්‍රීරෝද රථයක් සහ ටිපර්  රථයක් මුහුණට මුහුණ ගැටීමෙන්  ත්‍රීරෝද රථයේ ගමන් ගත් යුද හමුදාවේ සේවය කරන සෙබළුන් දෙදෙනෙකු මියගොස් තවත් එහි ගමන් ගත් අයකු බරපතළ තුවාල ලබා ඇතැයි පොලිසිය කියයි.
 
අනික් අනතුර සිදුව ඇත්තේ දඹුල්ල ගලේවෙල ප්‍රධාන මාර්ගයේ කනාදන  ප්‍රදේශයේදී යතුරුපැදියක් වේගය පාලනය කර ගැනීමට නොහැකිව විදුලි කණුවක ගැටීමෙන් සිදු වූ අනතුරකින් බව පොලීසිය කියයි. මියගිය අය  ගල්ගමුව ප්‍රදේශයේ පදිංචි කරුවෙකු බවට හඳුනාගෙන ඇතැයි පොලීසිය සඳහන් කළේය.
 
ත්‍රීරෝද රථ හා ටිපර් රථ අනතුරෙන් මියගොස් ඇත්තේ ගලේවෙල යටිගල්පොත්ත ප්‍රදේශයේ පදිංචි යුද හමුදාවේ සේවය කරන නිවාඩු පැමිණ සිටී සමිත් මධුරංග ඒකනායක (22) හැවිරිදි සහ සුපුන් කල්හාර  රාජතිලක (22)හැවිරිදි  යන දෙදෙනා  වෙති . ඔවුන් දෙදෙනාම  දීයතලාව ප්‍රදේශයේ යුද හමුදා කඳවුරක සේවය කරන බව නිවැසියෝ පවසති.
 
ත්‍රීරෝද රථය තවත් මෝටර් රථයකට වේගයෙන් ඉස්සර කිරීමට යාමේදී ඉදිරියෙන් පැමිණි  ටිපර් රථයේ  මුහුණට මුහුණ ගැටී මෙම අනතුර සිදුවී තිබේ.
 
එම  අනතුරින් යුද හමුදා සෙබළුන් දෙදෙනා එම ස්ථානයේදීම මිය ගොස් තිබෙන බවත්  තුවාල ලැබූ ඔවුන්ගේ මිතුරා ගලේවෙල ප්‍රාදේශීය රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා කුරුණෑගල මහ රෝහලට මාරු කර යවා තිබිණි.
 
අනෙක්  අනතුර වූ යතුරුපැදිය වේගය  පාලනය කරගැනීමට නොහැකිව වීදුලි කණුවක ගැටීමෙන් තුවාල ලැබූ පුද්ගලයා ද ප්‍රදේශවාසීන් ගලේවෙල රෝහලට  ඇතුලත් කිරීමෙන් පසු මිය ගොස් ඇතැයි පොලිසිය කියයි.
 
ටිපර් රථය පැදවූ රියැදුරු සැකපිට අත්අඩංගුවට ගත් බව ගලේවෙල පොලීසිය කියයි.   අනතුරු දෙකටම හේතුව නොසැලකිලිමත් රිය ධාවනය  බව ගලේවෙල පොලිසිය කියයි.