(කුෂාන් ජයවර්ධන)

තිරප්පනේ නාච්චාදූව ප්‍රදේශයේ දී වන සංරක්ෂණ දෙපාරතමේන්තුවේ නිලධාරීන් පිරිසකට අද (24) මැර ප්‍රහාරයක් එල්ල වී තිබේ.

පහරකෑමට ලක් වූ වන නිලධාරීන් දෙදෙනෙකු මේ වනවිට ප්‍රතිකාර සඳහා අනුරාධපුර මහ රෝහලට ඇතුළත් කර ඇති බව පොලිසිය පැවසීය.

මෙලෙස මැර ප්‍රහාරයට ලක්ව ඇත්තේ කැකිරාව අඩවි වන කාර්යාලයට අනියුක්තව සේවය කළ බීට්ටු වන නිලධාරියක් සහ වන ක්ෂේත්‍ර සහකාරවරයෙකි.

තිරප්පනේ නාච්චාදූව ප්‍රදේශයේ පිහිටි වන සංරක්ෂණ දෙපාරතමේන්තුවට අයත් රක්ෂිතයක් අනවසරයෙන් එළිපෙහළි කරන බවට ලද තොරතුරක් අනුව වන සංරක්ෂණ නිලධාරීන් එම ප්‍රදේශයට ගොස් තිබේ.

එහිදී රක්ෂිතය එළිපෙහළි කරමින් සිටි සැකකරුවෙක් සමඟ ට්‍රැක්ටර් රථයක් වන සංරක්ෂණ දෙපාරතමේන්තුවේ නිලධාරීන් අත්අඩංගුවට ගෙන ඇත.

අත්අඩංගුවට ගත් සැකකරු සහ ට්‍රැක්ටර් රථය එම ස්ථානයෙන් රැගෙන යාමට කටයුතු කළ අවස්ථාවේදී තවත් පිරිසක් එම ස්ථානයට කඩාවැදී  වැටලීම සිදුකළ වන නිලධාරීන්ට පහර දී අත්අඩංගුවේ සිටි සැකකරු සහ ට්‍රැක්ටර් රථය ද රැගෙන පලා ගොස් තිබේ.

සිද්ධියට සම්බන්ධ සැකකරුවන් මේ වනවිට හඳුනාගෙන ඇති බව පොලිසිය කීය.

සැකකරුවන් අත්අඩංගුවට ගැනීමට තිරප්පනය පොලිසිය විශේෂ පොලිස් මෙහෙයුමක් ආරම්භ කර තිබේ.